Në verën e vitit 2023, Bilall Kasami kritikonte me tone të ashpra Artan Grubin për organizimin e koncerteve me artistë të estradës, duke i quajtur ato shpenzime të kota në kohë krizash dhe tallje me hallet e qytetarëve. Sot, po ai Bilall, si kryetar i Tetovës, jo vetëm që po organizon koncerte të njëjta – por me të njëjtët artistë, në të njëjtin format dhe me të njëjtën retorikë entuziazmi, shkruan PressOnline.al

Majk, këngëtari që dikur përmendej si simbol i shpërdorimeve të qeverisë, sot është “ylli i mbrëmjes” i Netëve Rinore që promovohen nga vet kryetari në faqen e tij. Edhe skena e koncerteve është kthyer nga “harxhim” në “frymëzim rinor”.

Në politikën shqiptare, duket se nuk ka më dallim midis atyre që qeverisin dhe atyre që i kritikojnë – të gjithë rrotullohen rreth të njëjtave formula: pak zhurmë, pak muzikë, shumë PR.

Dhe ndërkohë që artistët s’kanë faj – ata bëjnë punën e tyre – mbetet pyetja: A është ky vetëm një tjetër rast i radhës ku pushteti e bën të pranueshme çdo gjë që e bënte të papranueshme opozita?

Nisma e Ministrit të Shëndetësisë Azir Aliu për “Kabinetin mobil”, e promovuar me shumë zhurmë në Shtip, duket më tepër si përpjekje për të krijuar iluzionin e afërsisë me qytetarët sesa një hap konkret drejt përmirësimit të sistemit shëndetësor në Maqedoninë e Veriut, shkruan PressOnline.al

Qytetarët e këtij vendi nuk kanë mungesë takimesh me politikanë, por vuajnë për një sistem ku mungojnë mjekët, ku pajisjet diagnostike janë të amortizuara, dhe ku spitalet e rajoneve funksionojnë me staf minimal dhe resurse të kufizuara. Në vend të improvizimeve me kabinete mobile, do të ishte shumë më efektive të përmirësoheshin kushtet në repartet e urgjencës, të sigurohej furnizim stabil me barna esenciale dhe të rriteshin pagat dhe motivimi i stafit mjekësor.

Takimet me qytetarët janë të rëndësishme, por kur ato vijnë të orkestruara përmes regjistrimeve paraprake dhe platformave zyrtare, krijohet përshtypja e një procesi të filtruar, jo të sinqertë. Sistemi shëndetësor nuk ka nevojë për “show” politik në fundjavë, por për reforma të vërteta, për politika që sjellin ndryshim në përditshmërinë e pacientëve.

Në vend që të “shëtisë” me kabinetin mobil nëpër spitalet e vendit, Ministri Aliu duhet të dëgjojë zërin e mjekëve të djegur nga kushtet e punës, të nënave që presin me orë për një pediatër, apo të pacientëve që duhet të udhëtojnë nga qytetet e ndryshme në Shkup për trajtime bazike.(PressOnline.al)

Pjesëmarrja e Taravarit në Konferencën e Veprimit Politik Konservator (CPAC) në Washington D.C. nuk është një rastësi. Kjo ngjarje është ndër më të mëdhatë në spektrin politik konservator global dhe mbledh liderë, strategë dhe figura me ndikim nga e gjithë bota. Të jesh pjesë e saj do të thotë të jesh në tryezën ku diskutohen vizione, politika të mëdha dhe drejtimet ideologjike të së ardhmes.
Takimet që zhvilloi Taravari, përfshirë atë me kongresisten republikane Nicole Malliotakis dhe Mercedes Schlapp, ish-drejtore për komunikime strategjike në administratën Trump, tregojnë për një qasje të mirëkalkuluar drejt ndërtimit të një boshti bashkëpunimi me kampin konservator amerikan – një nga qendrat më me ndikim në politikën ndërkombëtare sot.
Aleanca me Partinë Republikane – sinjal për orientim strategjik
Bashkëpunimi i paralajmëruar me Partinë Republikane nuk është thjesht një marrëdhënie ndërpartiake. Ai sinjalizon një orientim euroatlantik të pakompleksuar, një përpjekje për të ndërtuar urë reale me institucionet dhe qendrat e vendimmarrjes që ndihmojnë në formësimin e gjeopolitikës globale. Në një kohë kur Ballkani përballet me rrezikun e shtuar të ndikimeve autokratike, përfshirë ato nga Rusia dhe Kina, ky pozicionim është i domosdoshëm dhe i mençur.

Politikë me horizont, jo me cikël zgjedhor
Taravari me këtë vizitë ka përcjellë edhe një mesazh të brendshëm – veçanërisht për qytetarët shqiptarë në Maqedoninë e Veriut. Ai po ofron një model politik që nuk është i ndërtuar mbi kompromiset për pushtet afatshkurtër, por mbi ndërtimin e infrastrukturës ideologjike, institucionale dhe ndërkombëtare të një partie që synon të jetë faktor i qëndrueshëm dhe i besueshëm.
Në një klimë ku shumë politikanë janë të përqendruar në fushatën e radhës, kjo vizitë vjen si një investim në gjeneratat që vijnë, jo vetëm në zgjedhjet që afrohen.
Një vizitë me mesazh të qartë
Vizita e Arben Taravarit në SHBA është më shumë se një kalim protokollar. Ajo është një deklarim i pozicionit politik, një ftesë për shqiptarët që të mendojnë ndryshe për rolin e tyre në rajon dhe një sinjal i qartë se Aleanca për Shqiptarët nuk është projekt sezonal, por një nismë politike që kërkon të krijojë rrënjë në politikën serioze, me miq të vërtetë dhe partnerë afatgjatë.
Në kohën kur retorika politike lokale shpesh është e përqendruar në sulme personale dhe populizëm të zbrazët, Taravari përmes kësaj vizite po artikulon një qasje ndryshe: politikë me parime, vizion dhe përkatësi strategjike.