Kryetari i Aleancës për Shqiptarët, Arben Taravari, deklaroi se disa nga figurat aktuale të koalicionit VLEN kishin shprehur gatishmëri për të marrë mbështetjen e BDI-së në zgjedhjet për komunën e Likovës.

Në emisionin “Debat në SHENJA”, Taravari përmendi konkretisht Nexhmedin Sadikun, kandidatin aktual të VLEN-it për Likovën, si dhe Omer Ajdinin.

“Nexhmedin Sadiku, kandidati për Likovë, erdhi në zyrën time dhe tha se mund të jetë kandidat i pranueshëm edhe për BDI-në, edhe për Aleancën. E njëjta gjë vlen edhe për Omer Ajdinin. Para disa ditësh, në një restorant në Shkup, në prani të dy shokëve të tij, e pranoi se kishte qenë i gatshëm të dilte si kandidat i përbashkët me BDI-në,” u shpreh Taravari.

Ai gjithashtu përmendi rastin e Rexhail Qerimit, duke theksuar se në atë kohë Izet Mexhiti ishte nënkryetar i BDI-së dhe sipas tij, nuk kishte ndërmarrë asnjë hap për ta kundërshtuar mbështetjen ndaj kandidaturave të tilla.

Me entuziazëm dhe pjesëmarrje të madhe të qytetarëve, mbrëmë në fshatin Vrapçisht u hap shtabi zgjedhor i kandidatit për kryetar komune të Vrapçishtit nga AKI, Isen Shabani, njofton SmartNews

Pritja e ngrohtë dhe përkrahja masive nga banorët u cilësua nga Shabani si një sinjal i qartë fitoreje në zgjedhjet e 19 tetorit.

Shabani falënderoi të pranishmit për mbështetjen e vazhdueshme dhe theksoi se kjo atmosferë i jep edhe më shumë forcë për të çuar përpara vizionin e tij për komunën e Vrapçishtit.

Postimi i plotë i Shabanit:

“Atmosferë fitoreje në Vrapçisht!
Faleminderit për përkrahjen e madhe 🤝🏻

#AleancaKombëtarepërIntegrim 4️⃣”, përfundon Shabani./SmartNews.mk/

Në të ardhmen, drejtorët dhe zëvendësdrejtorët e burgjeve në Maqedoninë e Veriut do ta kenë kartelën e legjitimimit (bexhin) vetëm në gjuhën maqedonase. Kështu parashihet në propozim-ligjin e ri për ndryshimin dhe plotësimin e Ligjit për Ekzekutimin e Sanksioneve, i cili tashmë është publikuar në faqen e ENER-it dhe sot u debatua në një seancë publike në Akademinë e Shkencave dhe Arteve të Maqedonisë, shkruan gazeta KOHA.

Sipas përfaqësuesve të Ministrisë së Drejtësisë, si propozues i ndryshimeve, ligji aktual ka disa mospërputhje me ligje të tjera relevante, duke shkaktuar probleme në zbatimin praktik. Megjithatë, në propozimin e ri është fshirë krejtësisht paragrafi 3 i nenit 12, i cili përcaktonte qartë se legjitimiteti zyrtar i drejtorit jepet edhe në gjuhën maqedonase, edhe në gjuhën e komunitetit që përbën mbi 20% të popullsisë (gjuha shqipe).

“Drejtori i institucionit posedon legjitimitet zyrtar në të cilin janë të përcaktuara autorizimet e tij dhe e njëjta jepet në gjuhën maqedonase dhe në shkrimin e saj cirilik, ndërsa personit zyrtar që flet gjuhë të qytetarëve që e flasin 20 për qind (gjuha shqipe), e njëjta i jepet në maqedonisht dhe në gjuhën më të cilën e flet”, thuhet në paragrafin 3 të nenit 12 të ligjit aktual.

Ky nen për gjuhën shqipe ishte futur në janar të vitit 2024 me propozim të ish-ministrit të Drejtësisë, Krenar Lloga. Por tani, me propozimin e ministrisë që drejtoheg nga Igor Filkovi nga ZNAM-i, paragrafi hiqet dhe teksti i ri nuk parasheh përdorimin e gjuhës shqipe në asnjë formë.

“Paragrafi 4 i nenit 4 ndryshohet dhe do të ketë këtë përmbajtje: ‘Drejtori i institucionit posedon legjitimacion zyrtar në të cilin janë të përcaktuara autorizimet e tij’”, thuhet në propozim-ligjin e ri.

Profesorja Gordana Lazhetiq, e cila është kryetare e Grupit punues për përgatitjen e ndryshimeve të Ligjit për Ekzekutimin e Sanksioneve, nuk pranoi të përgjigjet në pyetjen e profesorëve shqiptarë të drejtësisë se pse në propozim-ndryshimet e reja të Ligjit është hequr paragrafi që parashikon gjuhën shqipe në kartat e identifikimit të drejtuesve të burgjeve.

“Nuk kam përgjigje, nuk mund ta komentoj…”, tha shkurt Lazhetiq, ndërsa përgjigje nuk dha as drejtori i Drejtori për ekzekutimin e sanksioneve në burgje, Aleksandar Pandov.

Veç kësaj, profesorë nga Universiteti i Tetovës dhe UEJL-së kanë reaguar ashpër, duke thënë se jo vetëm që hiqet shqipja nga ky ligj, por është ndaluar krejtësisht praktika e përfshirjes së ekspertëve shqiptarë në Grupet punuese të Ministrisë së Drejtësisë. Kjo, sipas tyre, është kthim prapa në proceset e reformave ligjore që kërkohen nga Bashkimi Evropian dhe rrezikon barazinë gjuhësore dhe eliminon përfaqësimin e shqiptarëve në proceset reformuese. (koha.mk)