Një delegacion i nivelit të lartë i Aleancës për Shqiptarët, i kryesuar nga kryetari i partisë Dr. Arben Taravari, ka nisur një vizitë në bashkitë juglindore të Republikës së Shqipërisë.

Në përbërje të delegacionit janë:
• Dr. Arben Taravari – Kryetar i Aleancës për Shqiptarët
• Valbon Limani – Kryetar i Komunës së Gostivarit
• Blerant Ramadani – Kandidat për kryetar të Komunës së Sarajit
• Isen Shabani – Kryetar i Komunës së Vrapçishtit
• Nazim Taipi – Kandidat për kryetar të Komunës së Tearcës

• Garip Kaba – Nënkryetar i Aleancës për Shqiptarët

Vizita zyrtare ka filluar me takimin në Bashkinë e Pogradecit, ku delegacioni është pritur nga kryetari i bashkisë, z. Ilir Xhakolli. Gjatë këtij takimi u diskutua për mundësitë konkrete të bashkëpunimit ndërinstitucional në fusha me interes të ndërsjellë si zhvillimi lokal, turizmi, kultura dhe nismat ndërkufitare.

Në vijim të vizitës, delegacioni do të zhvillojë takime edhe me:
• Sotiraq Filo – Kryetar i Bashkisë Korçë
• Erion Isai – Kryetar i Bashkisë Kolonjë
• Pal Kolevski – Kryetar i Bashkisë Pustec

Këto takime synojnë të krijojnë ura bashkëpunimi mes komunave dhe bashkive, me fokus në zhvillimin lokal, shkëmbimet ekonomike, promovimin e kulturës dhe turizmin ndërkufitar.

Aleanca për Shqiptarët, si një forcë politike me vizion kombëtar dhe zhvillimor, vazhdon të ndërtojë marrëdhënie të qëndrueshme me faktorët shqiptarë në rajon, duke dëshmuar përkushtim ndaj bashkëpunimit mbarëkombëtar dhe ndërlidhjes institucionale.

Arben Taravari, kryetar i Partisë Aleanca për Shqiptarët ka komentuar nga Pogradeci incidentin e ndodhur në Kumanovë gjatë ndeshjes së basketbollit me Rumaninë.

“Ishte një ngjarje skandaloze”, tha ai, ndërsa tha se kryeministri i Maqedonisë së Veriut në mënyrë fyese ndaj shqiptarëve fliste në parlament dhe kjo natyrisht reflektohet tek qytetarët.

“Ishte ngjarje skandaloze, të cilën realisht e kemi komentuar të gjithë politikanët në Maqedoninë e Veriut edhe të disa partive politike shqiptare por edhe disa maqedonase. Dua të falënderoj publikisht për solidarizimin që dha Shqipëria edhe Kosova. Ky është një trend muajt e fundit që rritet nacionalizmi maqedonas dhe kjo është edhe arsyeja që Aleanca për Shqiptarët e lëshoi edhe qeverinë pata tre muajsh dhe tani jemi në opozitë dhe po përgatitemi për zgjedhjet lokale.

Disa ditë para ngjarjes në ndeshjen e basketbollit në Kumanovë, kryeministri në mënyrë fyese ndaj shqiptarëve fliste në parlament dhe kjo natyrisht reflektohet tek qytetarët. Gjithashtu edhe atë që e tha që qëndron edhe në raportin e BE se bota serbe ka ndërhyrë thellë në Maqedoninë e Veriut dhe këto janë pasoja të funksionimit të inkuadrimit së botës serbe në politikat maqedonase. Shqiptarët e Maqedonisë janë të ndarë në dy blloqe diçka që është e shëndetshme. Janë disa parti por të ndara në dy blloqe çka është me e shëndetshme për një shoqëri.”, u shpreh Taravari.

Enti Shtetëror i Revizionit (ESHR) ka konstatuar një sërë parregullsish dhe dobësish në funksionimin e Qendrës Sportive “Boris Trajkovski” në Shkup për vitin 2023, të cilat kanë rezultuar në objekte jofunksionale, pajisje të amortizuara dhe humbje të mundësive për gjenerimin e të ardhurave shtesë. Revizioni ka dhënë mendim me rezervë për pasqyrat financiare dhe mendim të pafavorshëm për përputhshmërinë me ligjet.

Sipas raportit, Akva-parku, i cili është pjesë e kompleksit, është mbyllur në vitin 2024 dhe nuk sjell më të ardhura. Vendimi për mbylljen është marrë për shkak të joefikasitetit ekonomik dhe përfundimit të garancisë 10-vjeçare për pajisjet dhe instalimet. Në vitin 2023, Akva-parku kishte gjeneruar të ardhura prej 4.29 milionë denarësh, që është 41% më pak se sa ishte planifikuar.

Revizioni gjithashtu ngre shqetësime për sistemin solar për ngrohjen e pishinës, i cili nuk është funksional për shkak të defekteve teknike. Për këtë sistem, qendra ka paguar pothuajse 26 milionë denarë, ndërsa vlera e tij aktuale në librat financiarë është vetëm 2.85 milionë denarë.

Është konstatuar gjithashtu një mundësi e humbur për të ardhura nga menaxhimi i parkingut. Edhe pse qendra ka të drejtë ta përdorë atë, prej vitesh nuk ka arkëtuar asgjë nga parkimi.

Probleme janë identifikuar edhe në dhënien me qira të hapësirave afariste. Edhe pse qiratë caktohen përmes ankandeve publike elektronike, në 14 nga 24 kontrata aktive, çmimi i arritur ka qenë më i ulët se vlera fillestare e vlerësuar, me ulje që variojnë nga 6% deri në 50%. Këto kontrata janë lidhur për katër vjet dhe zgjaten me anekse nën të njëjtat kushte, pa u përditësuar çmimet sipas tregut aktual.

Revizioni ngre gjithashtu çështjen e adaptimit të objektit për nevojat e samitit të OSBE-së në vitin 2023, për të cilin Ministria e Punëve të Jashtme (MPJ) ka shpenzuar mbi 124 milionë denarë. Revizorët kanë konstatuar se MPJ nuk ka dorëzuar procesverbale për punimet dhe pajisjet e instaluara, të cilat ende nuk janë transferuar zyrtarisht në pronësi të qendrës sportive.

Në raport gjithashtu theksohet se borxhi prej mbi 260 milionë denarësh ndaj Qytetit të Shkupit për ndërtimin e sallës, i krijuar në vitin 2011, është shlyer vetëm gjatë periudhës 2019-2023. Meqë qendra ka funksionuar me humbje, të gjitha mjetet për shlyerje janë siguruar nga buxheti shtetëror.