Aleanca për Shqiptarët shpreh indinjatën më të thellë ndaj përjashtimit të gjuhës shqipe nga tabelat rrugore në segmentin e sapoinauguruar Preseka–Pesoçan, pjesë e autostradës Kërçovë–Ohër. Mungesa e shqipes në mbishkrimet zyrtare të këtij aksit është një skandal institucional dhe një akt flagrant diskriminimi, i cili tregon qartë prapësinë me të cilën trajtohet gjuha shqipe në projektet shtetërore, edhe kur këto kalojnë përmes zonave të banuara me shqiptarë.

Përfaqësuesit e grupimit FLEN, të pranishëm në inaugurim, nuk dhanë asnjë reagim ndaj këtij skandali. Përkundrazi, u panë të garonin pas gërshërëve ceremonialë, për të dalë në fotografi me shiritin e kuq në dorë, sikur të ishin protagonistë të një projekti që është konceptuar dhe nisur gati dy dekada më parë.

Të vardisur pas pushtetit dhe interesave personale, ata nuk e vërejtën, ose nuk deshën ta vërejnë, mungesën e gjuhës shqipe në një projekt publik. Në vend që të mbronin dinjitetin dhe të drejtat e shqiptarëve, ata u mjaftuan me poza boshe për rrjetet sociale, duke u rreshtuar në vazhdimësi si figurantë të politikes së nënshtrimit dhe mohimit të identitetit shqiptar.

FLEN, i pavlerë dhe pa zë në qeveri, vazhdon të përvetësojë projekte të huaja dhe të heshtë para degradimit të të drejtave kolektive të shqiptarëve, siç është edhe rasti i fundit me fshirjen e shqipes nga tabelat rrugore në këtë aks.

Ky nuk është një rast i izoluar, por pjesë e një trendi të rrezikshëm të përjashtimit të shqiptarëve nga hapësira publike, ku FLEN jo vetëm që nuk reagon, por shërben si mbulesë legjitime për zbatimin e këtyre politikave diskriminuese.

Aleanca për Shqiptarët paralajmëron se do të ngrejë çështjen e përdorimit zyrtar të gjuhës shqipe në çdo nivel institucional, dhe nuk do të lejojë që përmes heshtjes së servilëve politikë, të normalizohet zhdukja graduale e shqipes nga jeta publike.

Tabelat rrugore janë vetëm një simbol – por pas tyre fshihet një realitet i hidhur: çdo ditë, shqiptarët po nëpërkëmben me pëlqimin e atyre që janë në pushtet vetëm për të bërë foto.

Aleanca për Shqiptarët

Aleanca për Shqiptarët ka reaguar me shqetësim dhe indinjatë ndaj mbështetjes së heshtur që grupimi politik FLEN, sipas saj, i ka dhënë projektligjit të ri për lojërat e fatit – një nismë e propozuar dhe drejtuar nga VMRO-DPMNE.

“Ky projektligj nuk sjell asnjë përmirësim real për shoqërinë shqiptare. Përkundrazi, ai përforcon dhe zyrtarizon praninë e industrisë së bixhozit në afërsi të komuniteteve tona, me pasoja të rënda sociale, ekonomike dhe psikologjike, sidomos për rininë shqiptare,” thuhet në reagimin e Aleancës.

Sipas Aleancës, e vetmja përpjekje e FLEN për të justifikuar mbështetjen e këtij projektligji është përmes një narrative mashtruese, e cila pretendon se me ligjin e ri do të vendoset distancë fizike prej 500 metrash mes kazinove dhe shkollave.

“E vërteta është ndryshe. Drafti aktual ka futur një klauzolë të re që shtyn në pafundësi afatin për zbatimin e kësaj distance, duke mos prekur asnjë nga objektet ekzistuese që ndodhen pranë shkollave. Me fjalë të tjera, kazinoja mbetet aty ku është, vetëm se tani do të jetë e ligjshme – me bekimin e FLEN dhe urdhrin e VMRO-së,” thekson më tej partia.

Aleanca për Shqiptarët akuzon FLEN për mungesë të plotë të vullnetit politik dhe përfshirje në pazare politike në dëm të interesit të qytetarëve shqiptarë.

“FLEN nuk ka as fuqi vendimmarrëse, as zë, as guxim politik për të mbrojtur interesat e shqiptarëve. Po pranon çdo vendim që i servohet nga VMRO-DPMNE, duke e dëshmuar edhe një herë se është në pushtet vetëm për interesa personale, klienteliste dhe financiare,” deklaron Aleanca.

Duke e konsideruar këtë projektligj si një tjetër premtim të pambajtur nga FLEN, Aleanca paralajmëron se “kursi politik përjashtues dhe i dëmshëm” do të marrë fund në zgjedhjet e tetorit.

“Lojërat e fatit nuk janë zhvillim. Janë kolaps moral, shoqëror dhe ekonomik. Pranimi i këtij ligji është pranim i kolapsit,” përfundon reagimi i Aleancës për Shqiptarët.

Në kumtesë nga Aleanca për Shqiptarët mbi ligjin e lojërave të fatit, koalicioni VLEN është quajtur grupimi FLEN. Ky term është përdorur pesë herë brenda kumtesës dhe nuk mund të llogaritet si gabim teknik, por i qëllimshëm dhe me simbolikën që VLEN-i po flenë në qeveri, shkruan Flaka

“Aleanca për Shqiptarët shpreh shqetësim dhe indinjatë të thellë ndaj qëndrimit të grupimit politik FLEN, i cili ka dhënë pëlqimin e tij të heshtur dhe të dëmshëm për projektligjin e ri për lojërat e fatit, një iniciativë që është përgatitur dhe drejtohet nga VMRO-DPMNE, dhe që pritet të miratohet në Qeveri këto ditë për t’u proceduar më tej në Kuvend”, thuhet në kumtesë.

Në një moment tjetër brenda kumtesës, ASH thekson që narrativi i vetëm që FLEN po përgatitet për të përdorë për të arsyetuar këtë bashkëfajësi është manipulues dhe mashtrues: pretendojnë se ligji i ri do të vendosë distancë fizike prej 500 metrash mes kazinove dhe objekteve shkollore – një propozim që ka qenë edhe më parë në draftin e vjetër dhe nuk ka prodhuar asnjë rezultat në terren.

Me fjalë të tjera, kazinoja mbetet aty ku është, vetëm se tani do të jetë e ligjshme – me bekimin e FLEN dhe urdhrin e VMRO-së, vijon kumtesa me emrin e ri për VLEN-in.

“Është e qartë për çdo qytetar se FLEN nuk ka as fuqi vendimmarrëse, as zë, as guxim politik për të mbrojtur interesat e shqiptarëve”, thuhet mes të tjerash në kumtesë.

Ky është edhe një premtim tjetër i pambajtur nga FLEN ndaj elektoratit shqiptar, të cilin e gënjyen me premtime për “moral politik” dhe “standarde të reja”, por që sot janë shndërruar në garant të interesave të industrisë së bixhozit dhe servilë të politikave destruktive të VMRO-së, shprehen nga Aleanca për Shqiptarët. Flaka