Aleanca për Shqiptarët denoncon ashpër hipokrizinë e përfaqësuesve të koalicionit, siç e quajn ata, FLEN, VLEN të cilët çdo ditë e më shumë tregojnë tendencë për të mashtruar opinionin publik, duke justifikuar dështimet e njëpasnjëshme dhe duke mbrojtur interesat personale dhe familjare në kurriz të shqiptarëve.

“Pak javë para zgjedhjeve lokale – datë kjo që për ironi të fatit u shpall nga kryetari i Kuvendit Afrim Gashi – Zeqirja Ibrahimi, një nga zërat më të zhurmshëm të FLEN-it në rrjetet sociale, vazhdon të premtojë punësimin e mbi 2.500 shqiptarëve në institucionet shtetërore. Ky është një premtim jo vetëm i pabazë, por edhe juridikisht i pamundur, pasi Ligji për Zgjedhje ndalon qartë punësimet gjatë periudhave parazgjedhore,” thekson Aleanca për Shqiptarët.

Sipas Aleancës, ndërkohë që FLEN shpalos iluzione në publik, në terren po ndodhin punësime të përzgjedhura për familjarët e ministrave dhe zëvendësministrave, si:

Kushëri i zëvendëskryeministrit Arben Fetai
Vëllai i zëvendësministrit të Punëve të Brendshme, Astrit Iseni
Bashkëshorti i zëvendësministres së Sportit, Safije Sadiku Shaini
Vëllai i ministrit Orhan Ibrahimi
Vajza e Latif Arifit
Dhëndri i ministrit Azir Aliu
“Ky është realiteti i FLEN: për militantin e ndershëm nuk ka as kontratë, e jo më vend të përhershëm, ndërsa për familjarët e funksionarëve, shpërblimi është me rroga të majme dhe pozita kyçe,” thekson Aleanca për Shqiptarët.

Aleanca i cilëson këto veprime si nepotizëm të pastër, i cili është shpërblim për besnikërinë politike ndaj VMRO-DPMNE-së, duke shtuar se FLEN nuk përfaqëson shqiptarët, por është vetëm instrument i partisë që historikisht ka luftuar të drejtat dhe barazinë e tyre.

“Në vend të transparencës, FLEN ofron kamuflime. Në vend të llogaridhënies, mashtrime. Në vend të përfaqësimit të denjë, puthadorë të VMRO-së,” thekson Aleanca për Shqiptarët.

Sipas tyre, sondazhet e fundit e kanë bërë të qartë vendin e FLEN-it, ndërsa tetori do të jetë jo vetëm dita e ndëshkimit, por edhe demaskimi i kësaj garniture të paaftë dhe të korruptuar.

“Aleanca për Shqiptarët është dhe do të mbetet në krah të qytetarëve, jo të interesave familjare dhe politike të individëve të zhytur në pazare,” përfundon Aleanca. Flaka

Bashkimi Demokratik për Integrim (BDI) ka reaguar ashpër ndaj hapjes së mbi 730 konkurseve publike në administratë, të cilat janë shpallur në prag të zgjedhjeve të tetorit. Sipas BDI-së, ky veprim nuk është gjë tjetër veçse një përpjekje e dëshpëruar për manipulim politik dhe blerje të përkrahjes elektorale.

“BDI e konsideron hapjen e mbi 730 konkurseve publike në prag të zgjedhjeve si një përpjekje të hapur dhe të dëshpëruar të Qeverisë për të manipuluar qytetarët dhe për të blerë përkrahje politike përballë humbjes së pashmangshme që e pret në tetor,” thuhet në deklaratën e lëshuar për mediat.

Sipas partisë, Qeveria aktuale po përpiqet të mbulojë një vit të plotë dështimesh, përfshirë mungesën e reformave, ngecjen në integrimet evropiane, dështimet në politikën e jashtme dhe mungesën e përparimit ekonomik.

“Pas një viti të dështuar në çdo drejtim, pa reforma reale, pa progres në integrimin evropian, pa zhvillim ekonomik, pa përmirësim të standardit jetësor dhe me dështime spektakolare në politikën e jashtme, kjo Qeveri po përpiqet të mbulojë dështimin me mjete të vjetra: punësime parazgjedhore në administratë,” thekson BDI.

Sipas tyre, konkurset që do të duhej të ishin instrument për ndërtimin e institucioneve funksionale, janë shndërruar në vegla elektorale, që synojnë të krijojnë iluzionin e një Qeverie aktive.

“Konkurset e shpallura janë të dizajnuara për të krijuar iluzionin e një Qeverie që ‘po punon’, kur në të vërtetë po dështon në çdo plan,” shton më tej partia.

BDI akuzon Qeverinë për mashtrim të drejtpërdrejtë të qytetarëve, duke i trajtuar ata si numra në fushatë, në vend që të ofrojë zgjidhje për problemet reale të shoqërisë.

“Kjo është një tentativë tjetër e radhës për të mashtruar qytetarët, për t’i trajtuar ata si numra në fushatë dhe për të siguruar mbështetje politike përmes interesit të ngushtë klientelist,” vijon deklarata.

Megjithatë, BDI shprehet e bindur se qytetarët nuk do të bien pre e këtij manipulimi dhe se zgjedhjet e ardhshme do të jenë një referendum popullor kundër Qeverisë aktuale.

“Zgjedhjet e ardhshme do të jenë një referendum i qytetarëve kundër kësaj politike manipuluese dhe të paaftë, një mundësi për të ndëshkuar keqqeverisjen, paaftësinë dhe arrogancën që po i kushton vendit vite të tëra stagnimi.”

BDI përfundon me një mesazh të qartë për pushtetin aktual:

“Asnjë konkurs i lënë i papërfunduar deri në zgjedhje nuk do të mund të rikthejë besimin e qytetarëve ndaj një pushteti që i ka tradhtuar pritjet dhe ka dështuar në çdo angazhim publik.”

“Qytetarët nuk manipulohen. Qytetarët gjykojnë. Dhe gjykimi do të jetë i qartë në tetor.” Flaka

Dy automjete zyrtare të cilat përdoren nga zëvendëskryeministrat Izeti Mexhiti dhe Arbër Fetai, janë fotografuar të parkuara në mënyrë të paligjshme rreth orës 23:00, pranë qendrës tregtare “Mavrovka” në Shkup, në afërsi të selisë së VLEN-it. Kjo është dokumentuar nga i portali 360 shkallë”, i cili ka ngritur pyetje të qarta për përdorimin e këtyre makinave, por nuk ka marrë përgjigje nga asnjë institucion shtetëror.

“Shkoda SuperB 4×4 me targa SK 4681 BS është në përdorim të zëvendëskryeministrit dhe ministrit për Mjedis Jetësor, Izeti Mexhiti, ndërsa automjeti tjetër, me targa SK 4685 BS, përdoret nga zëvendëskryeministri për qeverisje të mirë, Arbër Fetai”, konfirmoi Zyra për Punë të Përgjithshme dhe të Përbashkëta pranë Qeverisë për “360 shkallë”.

Një automjet i tretë i parkuar në të njëjtin vend, me targa SK 5227 BS, sipas të njëjtës zyrë, nuk figuron në pronësi shtetërore.

Ngjarja ndodhi mbrëmjen e 15 korrikut 2025. Pyetjet që “360 степени” u dërgoi institucioneve ishin të drejtpërdrejta:
– Çfarë detyrash zyrtare kishin dy zëvendëskryeministrat në atë orë të vonë?
– Pse automjetet zyrtare ishin të parkuara në mënyrë të paligjshme në një nga bulevardet kryesore të Shkupit?

Megjithatë, as nga Qeveria, as nga Ministria e Mjedisit Jetësor, as nga kabineti i Fetait nuk ka ardhur ndonjë përgjigje – edhe pas dy ditësh pune.

Kjo heshtje vjen vetëm disa ditë pasi kryeministri Hristijan Mickoski lavdëroi qeverinë e tij për përpjekjet kundër klientelizmit dhe korrupsionit sistematik, duke deklaruar:

“Kur e morëm përgjegjësinë për ta drejtuar shtetin, gjetëm institucione të bllokuara në rrjeta abuzimi dhe sistem korruptiv.”

Por realiteti në terren flet ndryshe.

“Fotografitë janë bërë para se të futen targat me ngjyrë për veturat zyrtare. Ne i pamë ato, i pyetëm dhe do të vazhdojmë të pyesim – çfarë do të ndërmarrë Qeveria?”, thotë “360 shkallë”.

Iviça Tomovski nga zyra qeveritare kishte paralajmëruar më parë se makinat shtetërore do të pajisen me targa të veçanta për t’u identifikuar lehtësisht:

“Do të jenë të dukshme si flamuri – kjo është qëllimi, që çdo veturë zyrtare të shihet.”

Por ndërkohë, sjellja e zyrtarëve të VLEN-it nuk përputhet me këto deklarata.

Paradoksi thellohet nga fakti që partia më e madhe në koalicionin qeveritar, VMRO-DPMNE, për vite me radhë në opozitë ka denoncuar përdorimin e veturave zyrtare për qëllime private, madje ka kërkuar dorëheqje të ministrave në raste të ngjashme.

“Tani, kur janë në pushtet, mbretëron heshtja”, komenton “360 shkallë”.

Kjo situatë hedh hije dyshimi mbi përkushtimin real të qeverisë për t’i dhënë fund abuzimeve me resurset publike dhe tregon se, në vend të ndryshimit të premtuar, praktikat e vjetra po vazhdojnë në mënyrë të heshtur dhe të pandërprerë, shkruan 360 Shkallë në gjuhën maqedonase, trasnsmeton Flaka.