Lajme ditore

Afrohet bashkëpunimi VMRO–VLEN–ZNAM për zgjedhjet vendore

Published

5 days ago

July 8, 2025

Admin01

Koalicioni qeveritar që u formua pas zgjedhjeve të fundit parlamentare tashmë po konturohet si një bllok i bashkuar edhe për zgjedhjet lokale. Kryetari i Komunës së Tetovës, Bilall Kasami, sot konfirmoi se VLEN është në fazën e analizës së kandidatëve për kryetarë komunash dhe se ende nuk ka vendim për kandidaturën në Shkup, por bashkëpunimi mes partive të koalicionit do të jetë i garantuar, shkruan Flaka

“Jemi në fazën e analizës së kandidatëve të VLEN-it. Nuk kemi vendosur nëse do të nxjerrim kandidat në Shkup. Kur do të kemi vendim edhe për komunat tjera do të kemi qëndrim për kandidatët tjerë. Ajo që e kam thënë është që si koalicion qeveritar, do të ketë bashkëpunim, në drejtim të përkrahjes së kandidatëve që do të shkojnë në raundin e dytë”, deklaroi Kasami, duke lënë të hapur mundësinë për kalkulime të mirëkoordinuara mes partnerëve të qeverisë.

Në të njëjtën linjë u shpreh edhe kryeministri Hristijan Mickoski, i cili bëri të qartë se bisedimet me VLEN dhe ZNAM për zgjedhjet lokale po ecin “në drejtim të mirë”, duke përmendur një marrëveshje në parim që do të mundësojë ndarje të territorit zgjedhor mes partnerëve të qeverisë.

“Pres që të mbështesim kandidatët e koalicionit VLEN në raundin e parë sepse besojmë fuqimisht se partia që nuk ka bërë asgjë për më shumë se 20 vjet… duhet të mposhtet në këto zgjedhje”, tha Mickoski, në një deklaratë që përveç që synon elektoratin maqedonas, përçon një mesazh politik edhe drejt elektoratit shqiptar.

Nga ana tjetër, për ZNAM-in, Mickoski konfirmoi se në shumicën e rasteve do të ketë kandidatura të ndara për listat e këshilltarëve, por edhe mbështetje të ndërsjellë për kandidatët për kryetarë komunash në komunat e dakorduara.

E gjithë kjo dinamikë politike po e formalizon një marrëveshje zgjedhore me koordinim të qartë politik, e cila për disa mund të përkthehet si bashkëpunim strategjik qeveritar, ndërsa për të tjerë si ndarje territori dhe kalkulim zgjedhor, ku “dashuria politike” është më shumë aritmetikë elektorale sesa vlerë e përbashkët.

Ndërkohë, qytetarët pritet të jenë dëshmitarë të një fushate zgjedhore ku dallimet ideologjike do të zbuten në emër të pushtetit, ndërsa konsensusi i interesit do të mbizotërojë mbi ndasitë politike tradicionale.

Lajme ditore

Aleanca për Shqiptarët: Sondazhi e vërteton – qytetarët nuk mashtrohen më nga mashtruesit politikë

Published

3 hours ago

July 13, 2025

Admin01

Sondazhi i publikuar nga MKD.mk, i realizuar nga agjencia Market Vision në periudhën 20 qershor – 4 korrik, konfirmoi një realitet që nuk mund të injorohet: grupimi politik VLEN ka humbur besimin e qytetarëve shqiptarë. Diferenca është e thellë, rënia është reale, dhe tentimet për të relativizuar këtë mesazh të qartë janë vetëm përpëlitje të një strukture që tashmë e ka kuptuar vendin e saj në skenën politike – në margjinë.

VLEN-i e ka ditur këtë, sepse edhe sondazhet e tyre interne japin pasqyrë të njëjtë, madje më të rëndë. Por në vend që të përballen me të vërtetën, zgjedhin propagandën dhe mohojnë realitetin. As logjistika e VMRO-DPMNE-së nuk do t’i shpëtojë nga ajo që i pret në tetor, një humbje e pashmangshme.

Aleanca për Shqiptarët shpreh mirënjohje për qytetarët që e kuptuan me mençuri dhe maturi vendimin tonë për t’u distancuar nga një qeveri diskriminuese dhe nga një grupim pa orientim, që i ktheu shpinën interesave të shqiptarëve. Largimi ynë nga VLEN nuk ishte veprim politik – ishte detyrim moral ndaj qytetarëve.

Ky sondazh është edhe një goditje për individët që tentuan të mbajnë peng ASH-në për interesa personale, për karrieristët që shisnin flamurin e ASH-së për një kolltuk qeveritar. Sot janë të ekspozuar. Tetori është afër, dhe pensionimi i tyre politik është proces i pashmangshëm. Kështu ndodh kur nuk dëgjohet zëri i qytetarëve dhe kur pushteti nuk fitohet, por dhurohet në pazare të pista.

Aleanca për Shqiptarët do të vazhdojë të qëndrojë në krah të shqiptarëve dhe qytetarëve, e pastër, e pa shitur dhe me qëndrim të qartë: barazi, drejtësi dhe përfaqësim real për shqiptarët, theksojnë nga Aleanca për Shqiptarët.

Lajme

Anketa- VLEN pëson rënie të fortë pas largimit të ASH-së së Taravarit: Nga 13% në 7.7%

Published

1 day ago

July 12, 2025

Admin01

Koalicioni VLEN ka pësuar një tkurrje të ndjeshme në rejtingun elektoral, sipas të dhënave të fundit të publikuara nga MKD.mk në bashkëpunim me agjencinë “Market Vision”. Ajo që bie më shumë në sy nga anketa është pikërisht rënia e theksuar e VLEN-it pas ndarjes së Aleancës për Shqiptarët të Arben Taravarit nga koalicioni, shkruan Flaka

Në anketën parafundit, e realizuar po nga të njëjtët bartës, VLEN gëzonte mbështetje prej 13%, ndërsa në anketën aktuale kjo mbështetje ka rënë në 7.7% – një rënie prej 5.3 përqind. Ky ndryshim përfaqëson një goditje serioze për bllokun që dikur pretendonte të përfaqësonte alternativën kryesore shqiptare në opozitë.

Ndarja e ASH-së së Taravarit, e cila aktualisht matet veçmas dhe ka rejting 3.6%, duket se ka ndikuar drejtpërdrejt në shpërbërjen e bazës elektorale të VLEN-it, duke e zvogëluar ndikimin e tij në skenën politike shqiptare në Maqedoninë e Veriut.

Kjo rënie e rejtingut ngre pikëpyetje të mëdha për fuqinë reale të VLEN-it në zgjedhjet e ardhshme dhe shtron nevojën për ristrukturim apo riformatim të qasjes politike të këtij koalicioni tashmë të fragmentuar. Flaka

Lajme

Anketa e MKD/ Ali Ahmeti dhe Arben Taravari kryesojnë me dallim të madh mes liderëve shqiptarë

Published

1 day ago

July 12, 2025

Admin01

Sipas anketës më të fundit të realizuar nga MKD.mk në bashkëpunim me agjencinë “Market Vision”, qytetarë të Maqedonisë së Veriut vlerësojnë se vendi po ecën në drejtimin e duhur, edhe ate një pakicë prej 34,3% e të anketuarve, të cilët besojnë se gjërat në vend po lëvizin pozitivisht, që paraqet rritje prej 3 përqind krahasuar me muajin prill. Nga ana tjetër, 40,5% vlerësojnë se vendi po shkon në drejtim të gabuar, përcjell INA.

Sa i përket rejtingut të liderëve të partive politike, në bllokun maqedonas prinë kreu i VMRO-DPMNE-së, Hristijan Mickoski me 26.9%, ndërsa në bllokun politik shqiptar është kreu i BDI-së, Ali Ahmeti me 6%. Pas tyre radhiten, Venko Filipçe me 4.7%, ndërsa në vendin e katërt qëndron kreu i ASh-së, Arben Taravari. Më pas vijojnë Maksim Dimitrievski me 3.0%, Dimitar Apasiev me 3.0%, Izet Mexhiti me 2%, Bilall Kasami me 1.9%, Afrim Gashi me 1.0%, etj.

Sa i përket rezultateve për partitë politike, kështu është rejtingu: VMRO-DPMNE me 23,8%, pas saj radhitet BDI me 5.5%, LSDM me 5.1%, E Majta, 2.5%, ZNAM 2.4%, ASH e Taravarit 1.6%, VLEN (BESA) 1.6%, VLEN (LD) 1.1%, VLEN (AAA) 0.8% si dhe partitë e tjera. Mbi 12% kanë thënë se nuk duan të zbulojnë, 9.7% nuk kanë vendosur, 15% nuk do të votojnë, 13,&% nuk e kanë vendosur se a do të votojnë, etj.

Anketa është zhvilluar në periudhën nga 20 qershori deri më 4 korrik 2025, përmes metodës CATI (intervistë telefonike me asistencë kompjuterike), me 1.200 të anketuar. Mostra është përfaqësuese në nivel shtetëror, bazuar në regjion, gjini, moshë dhe përkatësi etnike, sipas të dhënave të regjistrimit të popullsisë të vitit 2021.(INA)