Lajme
Presidenti Begaj me studentët e Maqedonisë: Pa gjuhë shqipe nuk ka atdhe, nuk ka Shqipëri, nuk ka shqiptari!

Në kuadër të Ditës së Alfabetit, Presidenti i Republikës, Bajram Begaj, zhvilloi një bashkëbisedim me të rinj nga treva të ndryshme shqiptare. Mes tyre ishin Mevlan Ademi, kryetar i Lëvizjes Studentore në Maqedoninë e Veriut, dhe përfaqësues të grupit nismëtar të saj, të angazhuar në nismën “Foli Shqip o Taj”. Në qendër të diskutimit ishin ruajtja dhe promovimi i gjuhës shqipe, si dhe rëndësia e bashkëpunimit për çështjet që i bashkojnë shqiptarët.
Në fjalën e tij, Presidenti Begaj vlerësoi angazhimin e të rinjve dhe theksoi se gjuha shqipe është një nga elementet themelore të identitetit kombëtar. Ai nënvizoi se ruajtja dhe promovimi i saj kërkojnë angazhim të përditshëm dhe veprime konkrete në familje, në shkollë, në institucione dhe në jetën e përditshme.
“Duhet të bëhemi më proaktivë për të zgjidhur çështjet që ndonjëherë mund të duken të vogla”, u shpreh Presidenti, duke iu referuar thënies së Nënë Terezës për rëndësinë e veprave të vogla, të bëra me dashuri të madhe.
“Duhet të bësh punë të vogla me dashuri të madhe për atë që është më e madhe se të gjithë ne: atdheun. Pa gjuhë, pa ‘Fol shqip!’ nuk ka atdhe, nuk ka Shqipëri, nuk ka shqiptari”, theksoi Presidenti Begaj.
Presidenti u ndal veçanërisht te përdorimi i gjuhës shqipe në Maqedoninë e Veriut, duke theksuar se të drejtat e garantuara nga Kushtetuta dhe ligji duhet të zbatohen edhe në praktikë.
Ai rikujtoi se, gjatë vizitës së tij në Maqedoninë e Veriut, mbajti një fjalë në gjuhën shqipe në Kuvendin e këtij vendi dhe u takua me studentët që protestonin për të drejtën e përdorimit të saj.
“Ju besoj e dini se Presidenti i Shqipërisë mbajti një fjalë në gjuhën shqipe në Kuvendin e Maqedonisë së Veriut. Kjo nuk ishte thjesht një formalitet. Ishte një mesazh për të treguar se shqiptarët në Maqedoninë e Veriut janë në tokën e tyre, në vendin e tyre, dhe kanë të drejtat e tyre, të drejta të cilat duhen mbrojtur. Jo pa qëllim bëra edhe një vizitë në Universitetin e Tetovës, ku u takova me një përfaqësi të studentëve që protestonin”, u shpreh Presidenti.
Presidenti nënvizoi se çështjet që lidhen me të drejtat e shqiptarëve kërkojnë vëmendje të vazhdueshme dhe bashkëpunim përtej dallimeve politike.
“Duhet që të gjithë shqiptarët, që janë përfaqësues të shqiptarëve në qeveri apo në opozitë, të bëhen bashkë për këtë çështje. Nuk ka çështje më të madhe se kjo”, theksoi Presidenti Begaj.
Duke sjellë në vëmendje Kongresin e Manastirit të vitit 1908, Presidenti e cilësoi atë si shembull të bashkimit të shqiptarëve rreth një çështjeje madhore kombëtare: alfabetit të përbashkët të gjuhës shqipe. Ai theksoi se edhe sot, kur bëhet fjalë për gjuhën, kulturën dhe të drejtat e shqiptarëve, është e rëndësishme që të gjithë të gjejnë gjuhën e përbashkët dhe të veprojnë së bashku.
Gjatë bashkëbisedimit, Presidenti Begaj solli si shembull komunitetin arbëresh në Itali, i cili ka ruajtur gjuhën, traditat dhe identitetin shqiptar ndër shekuj. Ai theksoi se kjo përvojë duhet të shërbejë si frymëzim për të gjithë shqiptarët, veçanërisht për të rinjtë, për ruajtjen e gjuhës dhe të kulturës edhe larg atdheut.
“Ata kanë ruajtur për më shumë se pesë shekuj gjuhën, kulturën, traditat dhe identitetin shqiptar, dhe janë krenarë për këtë gjë”, u shpreh Presidenti.
Në përfundim, Presidenti Begaj i inkurajoi të rinjtë të vijojnë me guxim angazhimin e tyre, duke theksuar se ndryshimi nis nga veprimet e vogla të përditshme dhe nga përgjegjësia e secilit për gjuhën, kulturën dhe identitetin kombëtar. Ai shprehu gatishmërinë për të mbështetur nismat e tyre dhe për të vijuar dialogun me ta.
16:26
Mickoski: Shtetit i nevojiten 5 miliardë euro në dy vitet e ardhshme për shlyerjen e borxheve
16:23
Përplasje në Kuvend për buxhetin e ri, opozita kritikon deficitin mbi 720 milionë euro
16:00
Nga dhjetori kamerat e sistemit „Safe City“ do të dënojnë edhe parkimin dhe ndalimin e parregullt
15:55
Ali Ahmeti: Ky shtet mund të jetojë dhe mbijetojë me bashkëjetesë të qëndrueshme mes dy kombeve më të mëdha – maqedonasve dhe shqiptarëve
Të Gjitha Lajmet
Më të Lexuarat
01
Sulejman Rushiti do të ligjërojë në Harvard për teatrin bashkëkohor dhe klasikët shqiptarë
02
Arben Taravari, ministër më i suksesshëm i Shëndetësisë që edhe sot vazhdon të sulmohet – Pse?
03
Arrestohen dy persona në Sërmnovë të Gostivarit, policia u sekuestron marihuanë
04
Arben Taravari vazhdon të jetë në shënjestër të sulmeve të pabaza të oponentëve, por çfarë la pas në Shëndetësi?
05
Rezelinda Dauti – përvojë e re akademike dhe klinike në Universitetin e Ankarasë

Gosip
Mickoski paralajmëron krizë energjetike, Filipçe ngre alarmin për shtrenjtimin e jetesës

Lajme
Mickoski: Shtetit i nevojiten 5 miliardë euro në dy vitet e ardhshme për shlyerjen e borxheve

Lajme
Përplasje në Kuvend për buxhetin e ri, opozita kritikon deficitin mbi 720 milionë euro

Lajme
Nga dhjetori kamerat e sistemit „Safe City“ do të dënojnë edhe parkimin dhe ndalimin e parregullt

Lajme
Ali Ahmeti: Ky shtet mund të jetojë dhe mbijetojë me bashkëjetesë të qëndrueshme mes dy kombeve më të mëdha – maqedonasve dhe shqiptarëve

Lajme
Ja sa do të shtrenjtohet rryma nga janari 2027

Lajme
Nga e hëna ftohje e ndjeshme, borë në zonat malore







