Mesut Bajrami ka shpallur zyrtarisht kandidaturën e tij të pavarur për këshilltar komunal në Kumanovë. Në një njoftim publik, Bajrami shprehu shqetësimin për gjendjen politike aktuale dhe, sipas tij, diskriminimin e vazhdueshëm ndaj shqiptarëve në këtë qytet.

“Duke parë gjendjen aktuale politike dhe diskriminimin ndaj shqiptarëve të Kumanovës, unë, Mesut Bajrami, dua t’ju njoftoj se sot shpall kandidaturën time për këshilltar komunal në Kumanovë, si kandidat i pavarur”, u shpreh ai.

Bajrami theksoi se synon t’u shërbejë qytetarëve shqiptarë me të gjitha kapacitetet e tij intelektuale, politike dhe humane. Ai gjithashtu kërkoi përkrahjen e qytetarëve përmes votës së tyre, duke premtuar se do të punojë me përkushtim për të fituar dhe justifikuar besimin e dhënë.

“Ju meritoni më shumë”, përfundon mesazhin e tij kandidati i pavarur.

Ish-politikani dhe mjeku i mirënjohur nga Struga, Artan Dika, ka reaguar ashpër ndaj vendimit të VLEN-it për të mbështetur kandidatë të cilët, sipas tij, kanë dosje të dokumentuar mashtrimi, shkruan Flaka Media

„Nuk është në nderin e VLEN-it të mbështes kandidat për kryetar komune me dosje të dokumentuar mashtrimi,“ – theksoi Dika.

Ai paralajmëroi se mbështetja e figurave të tilla jo vetëm që nuk sjell fitore në komuna, por përkundrazi, dëmton besueshmërinë e premtimeve politike.
„Duke mbështetur kandidat të tillë, as fitohet komunë e as bëhet ndryshim. Përkundrazi, krijohet bindja se premtimet për qeverisje të ndershme e drejtësi janë vetëm shpëlarje goje,“ – shtoi Dika.

Me këtë reagim, ai i bëri thirrje strukturave dhe qytetarëve që të mos bien pre e mashtrimeve politike, duke theksuar se ndryshimi i vërtetë nuk ndërtohet mbi figura të kompromentuara. Flaka Media

„Çairi sot është një nga komunat më jotransparente në Maqedoni. Korrupsioni dhe nepotizmi e ngulfatin zhvillimin, ndërsa komuna është e uzurpuar nga ata që e udhëheqin. Në vend që t’u shërbejnë qytetarëve, ata punojnë për interesat e tyre,“ – theksoi kandidati për kryetar të Komunës së Çairit, Bujar Osmani.

„Sot jam këtu për të dhënë fjalën se kjo merr fund pas ndryshimit të pushtetit më 19 tetor. Nga më jotransparentja, Komuna e Çairit do të jetë në pesë komunat e para për transparencë,“ – porositi Osmani.

Ai theksoi se fjalët boshe ua lë kundërshtarëve të tij politikë, ndërsa ai vetë do ta dëshmojë me vepra. Për këtë qëllim prezantoi setin e ri të mekanizmave për luftë kundër korrupsionit dhe mbrojtje të interesit publik nën emrin „Syri Qytetar“.

„Ky set përfshin katër zgjidhje të reja që deri më tani nuk i ka futur asnjë komunë. Nuk mjafton vetëm të kesh dëshirë, por nevojiten edhe mekanizma të qartë.“ Katër mekanizmat që e përbëjnë „Syrin Qytetar“ janë:

Hapja publike e tenderëve – Çdo hapje e ofertave për prokurime publike do të jetë publike, me transmetim direkt dhe me incizim të qasshëm në internet. Kjo lejohet me ligjin për prokurime publike deri në një fazë të caktuar të procedurës.

Gjatë gjithë procedurës do të zbatohet monitorim i pavarur nga OJQ dhe ekspertë për antikorrupsion në procesin e përzgjedhjes së ofertuesit më të favorshëm te tenderët më të mëdhenj, në mënyrë që të sigurohet procedurë e drejtë dhe ligjore.

“Arka publike” – Ndjekja online e llogarive, të hyrave dhe pagesave të komunës, përmes një mjeti të thjeshtë me të cilin qytetarët në çdo kohë do të mund të dinë se për çka shpenzohen paratë e tyre.

“Kontrolli AI” – Futja graduale e automatizimit të kontrolleve me mjete të inteligjencës artificiale, të cilat do ta eliminojnë anshmërinë njerëzore dhe do të alarmojnë nëse diçka nuk është në përputhje me ligjin.

„Me këto mekanizma konkrete dhe efikasë do të sigurojmë transparencë të vërtetë dhe do ta mbrojmë komunën nga korrupsioni. Kjo është angazhimi im ndaj qytetarëve të Çairit,“ – theksoi Osmani.