“Dibra nuk ndërtohet nga një zë i vetëm” – Shefki Lleshi emërohet Kryetar i Degës së Aleanca për Shqiptarët në Dibër

Me vendim të Këshillit Organizativ të Aleancës për Shqiptarët, Shefki Lleshi është caktuar Kryetar i Degës së partisë në Dibër.

Në një adresim publik drejtuar qytetarëve dhe bashkëqytetarëve të tij, Lleshi theksoi se këtë detyrë nuk e sheh si privilegj, por si përgjegjësi dhe obligim moral ndaj qytetit.

“Ky nuk është thjesht një lajm, por një barrë nderi. Dibra ka kohë që pret më shumë dinjitet, më shumë drejtësi dhe më shumë zhvillim,” u shpreh ai.

Ai nënvizoi se qyteti nuk duhet trajtuar si periferi, por si një qendër me histori dhe sakrificë.

“Dibra nuk është periferi e askujt. Është zemër, histori dhe sakrificë. Meritoni respekt, jo përbuzje,” deklaroi Lleshi.

Duke theksuar nevojën për bashkim, ai shtoi: “Dibra nuk ndërtohet nga një zë i vetëm. Rilind vetëm kur bashkohemi.”

Lleshi ka qenë pjesë e strukturave të Aleancës për Shqiptarët për vite me radhë, duke ushtruar funksione si Kryetar i Forumit Rinor – Dega Dibër, nënkryetar në nivel qendror si dhe anëtar i kryesisë qendrore dhe lokale.

Mesazhi i tij përfundoi me moton: “Dibra mbi të gjitha.”