Sekretari i përgjithshëm i Aleancës për Shqiptarët, Blerant Ramadani, ka reaguar lidhur me deklaratat e Arben Taravarit për përzgjedhjen e këshilltarëve për zgjedhjet komunale, duke theksuar se brenda koalicionit VLEN nuk ka përçarje, por një kulturë të shëndetshme demokratike.
Sipas Ramadanit, debatet dhe diskutimet mes partnerëve qeverisës janë normale dhe të domosdoshme për të garantuar vendime sa më të drejta dhe gjithëpërfshirëse. Ai vlerëson se qasja e Taravarit është konstruktive dhe synon të adresojë shqetësimet e mbështetësve të koalicionit. “Një koalicion i fortë nuk matet nga mungesa e debatit, por nga aftësia për të gjetur zgjidhje përmes dialogut dhe bashkëpunimit. Kjo situatë nuk duhet parë si përçarje, por si një mundësi për të forcuar unitetin dhe transparencën”, ka theksuar Ramadani.
Ai ka shtuar se VLEN mbetet i përkushtuar ndaj reformave dhe interesave të qytetarëve, duke ndërtuar një kulturë politike ku kritikat nuk përçajnë, por ndihmojnë në përmirësimin e proceseve vendimmarrëse.
“Ne kemi hyrë në politikë me një mision të qartë për ndryshim dhe drejtësi. Qytetarët presin nga ne që të punojmë me maturi dhe përkushtim për interesin e përbashkët”, ka përfunduar Ramadani.