Zëvendëskryeministri Arben Fetai, ka informuar se në Sarajevë është takuar me Senatoren belge Viviane Teitelbaum, anëtare e Komitetit Këshillues Federal për Çështjet Evropiane, me të cilën kanë diskutuar mbi perspektivën evropiane të Ballkanit Perëndimor dhe domosdonë e përshpejtimit të këtij proces.
“E informova Senatoren Teitelbaum mbi reformat që Maqedonia e Veriut po ndërmerr si pjesë e Agjendës së Reformave në kuadër të Planit të Rritjes së BE-së për Ballkanin Perëndimor, me fokus të veçantë në shtetin e së drejtës dhe reformën e administratës publike. Belgjika mbetet një mbështetëse e fortë e zgjerimit të BE-së dhe e përpjekjeve të vendit tonë për integrim në familjen evropiane”, ka shkruar Fetai.
Fetai ka shkruar se në emër të Qeverisë, Senatores Teitelbaum i ka shprehur mirënjohjen tonë të thellë për solidaritetin që Belgjika tregoi pas tragjedisë në Koçan, duke mirëpritur katër pacientë për trajtim në spitalet belge.
Sipas Fetait, ky akt humaniteti dhe mbështetjeje që ka shprehur Belgjika ndaj vendit tonë është dëshmi e lidhjeve të forta mes dy vendeve tona.