Zv.kryeministri për politika dhe qeverisje të mirë, Arben Fetai, ka takuar sot rektorin e Universitetit “Nënë Tereza” në Shkup, Izet Zeqiri, për tu njohur nga afër me kushtet në të cilat zhvillohen studimet në këtë universitet, por edhe për cilësinë e arsimit, shkruan gazeta LAJM.
“Unë isha këtu për tu njohur me kushtet në të cilat vepron Universitetit Nënë Tereza. Më vjen mirë që duket që ka pasur shumë progres duke marrë parasysh kushtet fillestare nga të cilat ka filluar ky universitet para 2 vitesh. Duket që është punuar shumë sepse kushtet këtu dukeshin shumë të mira, me një punë shumë të mirë që është shtyrë përpara nga rektori. Diskutuam për reformat sa i përket cilësisë në arsim, por edhe qeverisjes së vetë universitetit sepse e kemi parasysh se qeverisja nëpër universitete jo gjithmonë është në nivelin e duhur. Ne si VLEN kemi ardhur me premtimin për përmirësim të kushteve të veprimeve të universiteteve tona, por edhe të cilësisë në arsim, të qeverisjes së universiteteve këtu në mënyrë që të prodhojmë gjenerata të reja që janë mirë të arsimuara”, tha Fetai.
Rektori Zeqiri, tha se pret ndihmën e Fetai për lidhjen e bashkëpunimit të UNT-së me universitetet ndërkombëtare.
“Në takim u fokusuam në informacionet rreth universitetit Nënë Tereza, rreth kushteve, mënyrës së funksionimit, rreth sigurimit të cilësisë në UNT. Gjithashtu diskutuam edhe për çështjet e lidhjes së universitetit me universitetet në fushën ndërkombëtare, duke pasur përvojat e zv.kryeministrit dhe ndihmën që do të na i jep për lidhjen e universiteteve në Belgjikë. Biseduam edhe për fillimin e vitit akademikë. Ajo që ishte me rëndësi, biseduam edhe për punën që bën me ngritjen e cilësisë së arsimit, posaçërisht cilësisë së studimit në UNT”, tha Zeqiri pas takimit./Gazeta LAJM