Sot dhe të enjten afati i provimeve eksterne të maturës shtetërore

Maturantët e shkollave të mesme që nuk e kaluan provimin e maturës shtetërore në qershor do të japin sot provimin e parë të detyrueshëm ekstern – gjuhë amtare dhe letërsi. Më 14 gusht (e enjte), do të jepet provimi i dytë ekstern i provimit të maturës shtetërore në sesionin e provimeve të gushtit, shkruan Alsat.

Sipas të dhënave të Qendrës Shtetërore të Provimeve (QSHP), gjithsej 1118 nxënës janë regjistruar për dy ditët e provimeve. Testin e gjuhës amtare do ta japin sot: 352 – gjuhë maqedonase, 225 – gjuhë shqipe dhe nëntë kandidatë – gjuhë turke.

Për të enjten janë regjistruar: për gjuhën angleze – 779, një nxënës do të japë gjuhën frënge, dy – gjuhë gjermane, 27 – matematikë dhe një maturant është regjistruar për të dhënë provimin e estetikës.

265 gjimnazist do ta japin provimin, 835 – nga arsimi i mesëm profesional dhe 18 maturantë nga arsimi i mesëm artistik. Kandidatët do t’i japin provimet në semestrin e gushtit në mjediset e fakultetit.