Në intervistë për portalin e mirënjohur Nistori, kandidati për deputet dhe deputeti aktual nga radhët e VLEN, Halil Snopçe ka theksuar që VLEN do të jetë pjesë e Qeverisë së re, me marrëveshje me kushte të qarta, duke vazhduar rrugën evropiane, deri sa ka theksuar që oponentët nga Fronti Evropian janë të gatshëm që pakushte të formojnë Qeverinë me VMRO-në.
“24 prilli ishte njëfarë sondazhi për disponimin e qytetarëve në RMV. Fronti Europian fitoi pak më tepër vota se kandidati i VLEN-it, por një gjë është e padiskutueshme – qeverinë e ardhshme e formon VMRO-DPMNE-ja. Të gjithë shqiptarët të bashkohen edhe Fronti dhe VLENi, me LSDM nuk bëjnë qeveri. E tani bëhet pyetja nëse në qeveri me VMRO do të jetë Fronti Europian apo VLEN-i. Kishim një deklaratë nga Mickoski, i cili tha BDI-së mos na çoni emisarë sepse në qeverinë e ardhshme nuk ka vend për BDI. Ky është mesazh që BDI-së nuk intereson, sulmet e VMRO-së janë për qëllime të brendshme. Ata pajtohen që pa kushte pajtohen të jenë pjesë e qeverisë, qoftë edhe me VMRO-në. VLEN nuk ka pasur bashkëpunim me VMRO-në, për ne edhe LSDM edhe VMRO është e njëjtë. Ne do të hyjmë në qeveri me çdo parti që pranon kushtet themelore, që është vazhdimësia e rrugës europiane. Ne si Aleancë kur kemi hyrë në Qeveri kemi hyrë t’u japim shtytje ndryshimeve kushtetuese, si kusht për nisjen e negociatave, kjo nuk u bë. Edhe në qeverinë e ardhshme, kemi thënë se ne nuk hyjmë pa mos pasur marrëveshje për ndryshimet kushtetuese, pa votimin e ndryshimeve kushtetuese nuk nisin negociatat. Kjo kërkon kohë dhe ne do të japim afat kohor, por nëse nuk plotësohet në afatin kohor ne dijmë të dalim nga qeveria siç kemi ditur në të kaluarën. Në momentin kur u prishën parimet ne dijmë të dalim nga qeveria. “ – marrë nga intervista e Halil Snopçe për portalin Nistori.