Pas përfundimit të masave qeveritare për kufizimin e çmimeve të produkteve ushqimore bazë, çmimet siç pritej u rritën, thotë ministri i ekonomisë Besar Durmishi. Ai shton se do të presin që tregu të stabilizohet dhe nëse ka rritje të çmimeve, do të dalin me propozime konkrete. Sipas tij, tendenca e inflacionit po stabilizohet.
“Pas përfundimit të masave, normalisht pritej rritje e çmimeve, është si t’ju them efekt natyror, është thelbësore se si funksionon tregu, dhe nga maji deri në qershor kemi stabilizim të çmimeve, jemi në pritje edhe këtë muaj, do t’ju informojmë. Ne po presim të kalojë muaji i tretë dhe do të dalim me zgjidhje konkrete ose propozime konkrete“, deklaroi Besar Durmishi – Ministër i Ekonomisë.
Durmishi thotë se po punohet për zgjidhje afatgjate me qëllim të stabilizimin e inflacionit, që është rritja e prodhimit vendas.
“Aktualisht po punojmë për zgjidhje afatgjatë që përfshijnë rritjen e prodhimit vendas, prodhimin e ushqimit, të cilat do të ulin importet dhe do të ndikojnë drejtpërdrejt në inflacion kur importet të ulen. Kjo strategji përfshin kryesisht Ministrinë e Bujqësisë, por edhe institucione të tjera, me qëllim që të ofrohet një plan afatgjatë për uljen strukturore dhe të planifikuar të inflacionit”, shtoi Besar Durmishi – Ministër i Ekonomisë.
Ditë më parë kryeministri tha se shporta e konsumatorit duhet të ndahet në pesë segmente, një shportë konsumi për një njeri të vetëm, një shportë për një çift të ri, për një familje me tre dhe katër, dhe shportë konsumi për pensionistët, sepse, sipas tij, jo të gjitha kategoritë e qytetarëve shpenzojnë njësoj. Sipas llogaritjeve të Lidhjes së Sindikatave, që një familje prej katër anëtarësh të kalojë muajin, i duhen mbi 62 mijë denarë, ndërsa vetëm për ushqim i duhet pothuajse e gjithë paga minimale. /Alsat.mk