Premtimet e pambajtura në Reçicë të Madhe: Banorët kritikojnë Bilall Kasamin për mashtrime dhe dështime
Një rrugë që do të lidhte Reçicën e Madhe me autostradën, kanalizimi fekal dhe atmosferik, furnizimi me ujë të pijshëm, ndërtimi i trotuareve si dhe premtimi për hapjen e një fabrike çipsash kanë qenë disa nga zotimet kryesore të Bilall Kasamit para katër viteve. Megjithatë, sipas banorëve të Reçicës së Madhe, deri më sot asnjë nga këto premtime nuk është realizuar.
Banorët, të zhgënjyer, kanë deklaruar për portalin TS se Bilall Kasami i ka mashtruar me të gjitha premtimet e tij.
“Nuk ka punuar aspak. Na ka mashtruar me rrugën, me ujin e pijshëm, me fabrikën e çipsave,” – tha kryetari i Bashkësisë Lokale të Reçicës së Madhe.
Një tjetër banor theksoi:“Bilall Kasami i largoi të rinjtë nga Reçica me jorgane nëpër duar dhe na shtrenjtoi çmimin e mbeturinave.”
Një banor tjetër, i revoltuar, shtoi:“Ai e shkatërroi Reçicën. Nga 300 denarë që paguanim për gjubreta, tani paguajmë 600 denarë!”
“Nuk ka punuar fare. Kryetarja paraprake bëri diçka, kurse ky asgjë,” – u shpreh një tjetër qytetar.
Sipas banorëve, Bilall Kasami nuk ka pse kërkon vota në Reçicë të Madhe, pasi, sipas tyre, i ka zhgënjyer plotësisht.
Ndërkohë, vlen të theksohet se sipas anketave më të fundit, Bilall Kasami pritet të humbë zgjedhjet, kryesisht për shkak të rritjes së taksave komunale dhe dërgimit të mbi 10 mijë qytetarëve në përmbarim.