Ramadani: Pezullimi i Dialogut Strategjik Kosovë–SHBA na dhemb edhe neve në Maqedoninë e Veriut

Sekretari i Aleancës për Shqiptarët, Blerant Ramadani, ka reaguar pas pezullimit të Dialogut Strategjik mes Kosovës dhe Shteteve të Bashkuara të Amerikës, duke e cilësuar këtë zhvillim si shqetësues jo vetëm për Kosovën, por edhe për shqiptarët në Maqedoninë e Veriut.

“Ky zhvillim na dhemb edhe neve si shqiptarë në Maqedoninë e Veriut, sepse Kosova është shteti ynë fqinj dhe pjesë e pandashme e kombit tonë,” shkroi Ramadani.

Ai theksoi se marrëdhëniet e Kosovës me SHBA-në janë “pasuri kombëtare dhe garancia më e madhe për paqe e zhvillim në rajon”, duke bërë thirrje për unitet, maturi dhe reflektim në këto momente.

Ramadani shprehu bindjen se partneriteti mes Kosovës dhe SHBA-së do të riforcohet, duke u thelluar në shërbim të qytetarëve dhe stabilitetit rajonal.