Për qeverinë shpërdoruese të udhëhequr nga VMRO-DPMNE duket se ka para në buxhet vetëm për apetitet e tyre luksoze, por jo edhe për punëtorët që mezi mbijetojnë. Ndërkohë që kryeministri Mickoski përpiqet ta mashtrojë opinionin me një të ashtuquajtur bum ekonomik, qytetarët çdo ditë përballen me tronditje të reja çmimesh dhe deputetët e VMRO-DPMNE, ZNAM dhe VLEN nuk e votuan propozimin e partisë “E Majta” për rritjen e pagës minimale prej 500 eurosh, shkruan puls24.mk.
Ky projektligj u paraqit nga “E Majta” në bazë të kërkesës së sindikatave, por për fat të keq, Maqedonia është e udhëhequr nga një parti antipunëtore dhe autoritare, e cila u shërben vetëm interesave të kapitalit të madh.
Standardet e dyfishta dhe hipokrizia e kësaj qeverie të shkëputur nga realiteti bëhen edhe më të theksuara po të kemi parasysh që vetëm gjatë muajit maj, Shërbimi për Çështje të Përgjithshme dhe të Përbashkëta i Qeverisë ka lidhur dy tenderë me vlerë prej 450.000 eurosh. Konkretisht, drejtori i këtij shërbimi, Ivica Tomovski, ka nënshkruar një kontratë për furnizim me peshk, mish dhe produkte të përpunuara mishi në vlerë prej 11.8 milionë denarësh. Kontrata e dytë është për akomodim hotelier për funksionarët, me vlerë prej 16.5 milionë denarësh.
PR-i i shtrenjtë i pushtetit dhe i mediave të tij propaganduese se Maqedonia është “fuqia e katërt ekonomike” nuk i ushqen punëtorët e uritur. Në një situatë kur qytetarët po largohen në masë për shkak të varfërisë ekonomike, bëhet e qartë se prioriteti i kësaj qeverie të djathtë është pasurimi i kompanive të afërta me pushtetin, të cilat vazhdimisht rrisin fitimet milionëshe, ndërsa pagat e punëtorëve mbeten të ngrira./puls24.mk/