Kandidati për kryetar komune, Bujar Osmani, me një deklaratë të fuqishme shpalli betejën e tij të vendosur kundër bullizmit në shkolla, duke premtuar se Çairi do të bëhet komuna e parë në vend me një front sistematik dhe institucional kundër dhunës ndaj fëmijëve.
“Shkollat tona duhet të jenë tempuj të dijes dhe miqësisë, jo arena të frikës dhe përjashtimit. Nga Çairi do të dërgojmë një mesazh: Nuk tolerojmë bullizëm, nuk tolerojmë heshtje përballë padrejtësisë!”, deklaroi Osmani.
Ai paralajmëroi një ndryshim të plotë në mënyrën se si komuna do ta trajtojë problemin. Punëtori të rregullta për inteligjencën emocionale dhe empatinë, programe për aftësi digjitale, staf i shtuar psikologësh dhe pedagogësh në shkolla, si dhe një linjë anonime për raportim që do të jetë në dispozicion për çdo fëmijë. “Çdo fëmijë duhet ta dijë se ka kujt t’i drejtohet. Kjo është detyrimi im personal ndaj Çairit dhe ndaj së ardhmes,” theksoi Osmani.
Në këtë betejë ai do të përfshijë edhe prindërit, mësuesit, organizatat lokale, sportistët dhe artistët, duke krijuar, siç tha ai, “një mur bashkimi kundër dhunës”. “Nëse duam një komunitet të fortë, duhet të fillojmë me fëmijët tanë. T’u japim atyre siguri, mbështetje dhe shembull. Ky është themeli i çdo shoqërie me dinjitet,” nënvizoi ai.
Si kurorë e programit, Osmani paralajmëroi vendosjen e një “Dite kundër bullizmit” çdo vit. Një festival të tolerancës, dashurisë dhe miqësisë, i cili do të bëhet simbol i komunës dhe mesazh se Çairi është një komunitet pa frikë. Një komunitet që mbron dinjitetin e çdo fëmije.
“Lufta kundër bullizmit është më shumë se politikë lokale. Ajo është betejë për dinjitetin njerëzor, për barazinë, për të ardhmen e shoqërisë sonë. Nga Çairi do të fillojë rrëfimi i ri. Një rrëfim në të cilin fëmijët do të rriten me krenari, me forcë dhe pa frikë,” përfundoi Osmani.