Deputeti i Aleancës për Shqiptarët, Halil Snopçe, ka kritikuar ashpër qëndrimin e kryeministrit Hristijan Mickoski dhe heshtjen e ministrave shqiptarë pas deklaratës së ministres serbe, Milica Gjurgjeviç, e cila Maqedoninë e quajti territor të Serbisë.
“Në intervistën në Alsat, kryeministri Mickoski tha se ‘nuk e ka dëgjuar’ deklaratën e ministres serbe Milica Gjurgjeviç. Por unë, një javë më parë nga foltorja e Parlamentit, ia parashtrova të njëjtën pyetje dhe ai sërish nuk dha përgjigje,” theksoi Snopçe.
Ai shtoi se ky është një model i përsëritur nga kreu i qeverisë. “Kur nuk i përshtatet një temë, thotë ‘s’kam dëgjuar’. Ashtu bëri për brohoritjet e tifozëve kundër shqiptarëve në Kumanovë, ashtu po bën edhe tani,” deklaroi deputeti i ASH-së.
Snopçe nuk kurseu as ministrat e VLEN-it, të cilët sipas tij po mbajnë një heshtje të dëmshme. “Edhe më shqetësuese është heshtja e ministrave të VLEN-it. Nëse kryeministri bën sikur nuk dëgjon, atëherë pse ministrat shqiptarë nuk e hapin këtë temë? Heshtja e tyre i shërben vetëm atij,” u shpreh ai.
Në fund, ai shtoi me ironi: “Nëse nuk kanë guxim për më shumë, të paktën le të bëjnë rolin e ‘suflerit’ që t’ia kujtojnë kryeministrit gjërat që ai bën sikur nuk i dëgjon.”