Shkruan Nafie Selmani
Koordinatori i VLEN-it, deputeti më pasiv në Kuvend, Bekim Qoku, dje në pikë të natës qenka angazhuar aty ku di më së miri, në Facebook, për të kritikuar gazetarët që nuk mendojnë si ai, këtu e në Prishtinë/Tiranë.
Po akuzon BDI-në për korrupsion Qoku, por ende nuk ka shpjeguar pse është deputeti më i paguar për shpenzime udhëtimi që opinioni publik nuk e di a i ka bërë dhe në cilin drejtim. A nuk është kjo formë korrupsioni, Qoku?
Është e lehtë për VLEN-in e Qokun të thonë: “Ne kemi vetëm një vit në pushtet, ndërsa BDI ka pasur 23 vite.” Por çfarë e bën ndryshimin mes një qeverisjeje të djeshme dhe të sotme? E bën vullneti, serioziteti dhe guximi për të vepruar, e jo pallavrat tuaja në rrjete sociale.
Të thuash se fajtor është vetëm BDI-ja, është si të fajësosh të kaluarën dhe të shpërlash çdo përgjegjësi për të tashmen. Po a nuk erdhi VLEN-i në pushtet me premtimin se do të sjellë NDRYSHIMIN, do të sjellë drejtësi, se do të pastrojë institucionet nga korrupsioni dhe do të kthejë besimin te shteti dhe se do ta luftojë nepotizmin?
Çfarë bëtë ju, Qoku dhe VLEN-i në pikën e nepotizmit?
I punësuat nipërit, djemtë, tezakët, miqtë, jaraneshat e familjarët tuaj. Apo sipas filozofisë së Qokut, nepotizëm quhet vetëm kur bëhet nga të tjerët, por jo kur bëhet nga ai vetë dhe grupacioni politik ku bën pjesë ai -VLENI?!
Një vit e gjysmë nuk është pak për të treguar se në çfarë drejtimi lëviz një qeverisje. Është kohë e mjaftueshme për të dhënë shenja të qarta nëse ka vullnet për të luftuar korrupsionin e nepotizmin, apo thjesht po përdoret si slogan elektoral.
Nëse çdo dështim arsyetohet me “BDI-në që i ka bërë për 20 vite”, atëherë pse duhej ndërruar qeveria fare?
Qoku, je deputet, vepro si i tillë! Merru me punën për të cilën të paguajmë. Lëre Facebook-un për ne qytetarët, sepse po të paguajmë për punë konkrete, jo për pallavra në Facebook!