Ministri i Shëndetësisë, Azir Aliu, duket se ka më shumë angazhim me tenderët sesa me problemet reale të sektorit që drejton. Ndërsa Qendra Klinike Universitare përballet me kaos në infrastrukturë, mungesë parkingjesh dhe shërbime të mbingarkuara, Aliu është fokusuar tek nënshkrimi i kontratave me vlerë milionëshe.
Sipas të dhënave zyrtare të siguruara nga Byroja për Furnizime Publike, në vetëm nëntë ditë – nga 25 qershor deri më 4 korrik – Ministri Aliu ka nënshkruar katër tenderë, me vlerë totale prej 3.660.894 euro, përkatësisht 225.144.991 denarë.
Pra, për më pak se një javë pune efektive, kabineti i Ministrit është shndërruar në zyrë të furnizimeve publike, ndërsa vetë Aliu në një “robot nënshkrimesh”.
Ndërkohë që pacientët dhe familjarët e tyre përballen çdo ditë me mungesën e kushteve elementare – si parkingu, qasja në shërbime dhe transparenca në kujdesin shëndetësor – Ministri nuk ka dhënë asnjë zgjidhje konkrete apo prononcim publik lidhur me këto probleme. Heshtja e tij përballë mediave është bërë tashmë rregull, jo përjashtim.
Ndërkohë që tenderët milionësh vazhdojnë të mbushin agjendën e Ministrit Azir Aliu, pacientët me diabet paralajmërojnë revoltë të hapur publike për shkak të trajtimit diskriminues dhe shkurtimit të të drejtave të fituara.
Tenderët janë publike. Problemet – të neglizhuara. Dhe kjo tregon shumë për prioritetet aktuale të udhëheqjes në Ministrinë e Shëndetësisë.