Hazbi Lika-komandant Çela një nga komandantët e njohur të UÇK-së pas një heshtje të gjatë dhe largim nga politika duket se është rikthyer përsëri aktiv në këto zgjedhje por jo në krah të BDI-së, sot është takuar me kryetarin e LD-së dhe kandidatin për deputet të koalicionit VLEN, Izet Mexhiti.

Lika i jep mbështetje partisë së Mexhitit dhe koalicionit VLEN.

“Ia VLEN koordinimi me Hazbi Likën – Komandant Çelën. Ishte dhe mbeti i palëkundur në shërbim të luftëtarëve, qytetarëve dhe popullit shqiptar!”, ka shkruar Izet Mexhiti në një postim të shpërndarë në rrjetet sociale.

Lika ishte një nga themeluesit e UÇK-së, por edhe BDI-së.

Kryetari i Lëvizjes Demokratike, Izet Mexhiti sonte në tubimin qendror përfundimtar të VLEN-it në Shkup tha se për dy vite të tëra ka dëgjuar vetëm thirrjen: “Boll Më”.

Mexhiti më tej kishte një porosi për të gjithë ata që u dënuan padrejtësisht si dhe për të gjithë të rinjë që kanë emiguar në gurbet.

“Më shumë se dy vite të tëra kam lëvizur në çdo lagje, çdo mëhallë, çdo fshat, çdo qytet dhe kam dëgjuar vetëm një thirrje. Boll më, boll ishte për të gjithë ata shqiptar të dënuar padrejtësisht si Feta Alimi e shumë të tjerë. Boll ishte për të gjitha ato familje që në sofrat e Bajramit nuk i kanë më të dashurit e tyre, famijët e tyre ne gurbet. Sonte kam vetëm një porosi. Durim, sabër, rrini rahat, zullumi është trashë do të këputet kësaj radhe”, u shpreh Mexhiti.

Kryetari i Alternativës Afrim Gashi, në tubimin qendror të koalicionit VLEN në Sheshin Skenderbeu në Shkup, bëri thirrje që çdo votë më 24 prill të bëhet VLEN. Ai tha se kandidati i VLEN-it për president, Arben Taravari, është kandidati i vetëm që përfaqëson shqiptarët në këto zgjedhje presidenciale.

“Atëherë kur të tjerët thoshin se nuk është koha për president shqiptar, ne, ashtu siç premtuam, e kandiduam Dr. Arbenin i cili është kandidati i vetëm që i përfaqëson shqiptarët, që ka dalë nga një koalicion shqiptar, që mbështetet nga mërgata shqiptare dhe nga kryeministri Albin Kurti”, tha Gashi.

Kreu i Alternativës tha se opozita e bëri hapin e madh duke u bashkuar në VLEN, ndërsa VLEN-it iu bashkua edhe populli.
“Të gjithë e dimë se Zoti thotë në Kuran se “Ai nuk e ndryshon gjendjen e një populli derisa ata ta ndryshojnë veten e tyre.” Kjo do të thotë se kur ne, drejtuesit e këtij koalicioni, e ndryshuam veten tonë, pra i tejkaluam egot dhe hatërmbetjet tona e ia zgjatëm dorën njëri-tjetrit si vëllezër, atëherë me ne u bashkua edhe populli. E kur bashkohet populli, jam thellë i bindur se aty nuk mungon as dora e Zotit. Kur ne sakrifikojmë e dëshmojmë vetëmohim, atëherë mëshira e Perëndisë vjen si shpërblim”, tha Gashi.