Komisioni Shtetëror i Zgjedhjeve (KSHZ) në mbledhjen e parë pas shpalljes së zgjedhjeve lokale, miratoi afatet për të gjithë procesin zgjedhor. Listat e kandidatëve mund të dorëzohen deri më 13 shtator, ndërsa fushata do të fillojë më 29 shtator. Raundi i parë do të mbahet më 19 tetor, ndërsa i dyti më 2 nëntor, kur qytetarët do të zgjedhin kryetarët e komunave dhe këshilltarët komunalë në 80 komuna dhe në qytetin e Shkupit.
KSHZ do të kërkojë nga MPB të dhëna për azhurnimin e listës zgjedhore, e cila do të përmbyllet më 26 shtator. Shorti për renditjen në fletëvotim do të mbahet deri më 25 shtator, ndërsa Kodi për zgjedhje të ndershme duhet të nënshkruhet deri më 27 shtator. Tre ditë para zgjedhjeve mund të dorëzohen propozime për vëzhgues.
Kryetari i Kuvendit, Afrim Gashi, bëri thirrje për standarde të ndershme, demokratike dhe evropiane, pa presione, gjuhë përçarëse dhe keqpërdorim të burimeve.
Cikli zgjedhor do të kushtojë rreth 10 milionë euro, nga të cilat pjesa më e madhe do të shkojë për mbulim mediatik dhe reklamim politik të paguar. Këto zgjedhje janë më masivet për nga numri i pjesëmarrësve, ndërsa fushata do të zgjasë 20 ditë. (INA)