Nisma e Ministrit të Shëndetësisë Azir Aliu për “Kabinetin mobil”, e promovuar me shumë zhurmë në Shtip, duket më tepër si përpjekje për të krijuar iluzionin e afërsisë me qytetarët sesa një hap konkret drejt përmirësimit të sistemit shëndetësor në Maqedoninë e Veriut, shkruan PressOnline.al
Qytetarët e këtij vendi nuk kanë mungesë takimesh me politikanë, por vuajnë për një sistem ku mungojnë mjekët, ku pajisjet diagnostike janë të amortizuara, dhe ku spitalet e rajoneve funksionojnë me staf minimal dhe resurse të kufizuara. Në vend të improvizimeve me kabinete mobile, do të ishte shumë më efektive të përmirësoheshin kushtet në repartet e urgjencës, të sigurohej furnizim stabil me barna esenciale dhe të rriteshin pagat dhe motivimi i stafit mjekësor.
Takimet me qytetarët janë të rëndësishme, por kur ato vijnë të orkestruara përmes regjistrimeve paraprake dhe platformave zyrtare, krijohet përshtypja e një procesi të filtruar, jo të sinqertë. Sistemi shëndetësor nuk ka nevojë për “show” politik në fundjavë, por për reforma të vërteta, për politika që sjellin ndryshim në përditshmërinë e pacientëve.
Në vend që të “shëtisë” me kabinetin mobil nëpër spitalet e vendit, Ministri Aliu duhet të dëgjojë zërin e mjekëve të djegur nga kushtet e punës, të nënave që presin me orë për një pediatër, apo të pacientëve që duhet të udhëtojnë nga qytetet e ndryshme në Shkup për trajtime bazike.(PressOnline.al)