Gërvalla: Besimi i qytetarëve do të jetë udhërrëfyes i punës tonë

e postuar më at 09:22
127 0
Ministrja e zgjedhur e Punëve të Jashtme dhe Diasporës, Donika Gërvalla, ka thënë se në asnjë ditë të punës së tyre gjatë katër vjetëve të ardhshme nuk duhet ta harrojnë besimin e dhënë dhe shpresën e qytetarëve që fatin dhe të ardhmen e tij ta kenë udhërrëfyes kryesor gjatë punës.

Ajo përmes një statusi në Facebook ka shkruar se besimi i dhënë dhe punët që i kanë përpara janë kolosale.

Sipas Gërvalles ai që nuk e di se nga vjen, ai nuk e di as se për ku është nisur.

Ajo tutje ka kujtuar historinë e familjes së saj deri në ditët e sotme.

“Mbi 40 vjet kanë kaluar nga dhjetori i vitit 1979 kur Babi detyrohet të largohet nga Kosova e robëruar për të mos u kthyer më asnjëherë. Eshtrat e tij sot prehen në Kosovën e lirë, në Dubovik, pranë Bacit Bardhosh, Nanës Ajshe, Babës Bardh dhe të gjithë paraardhësve të tyre. Mbi 40 vjet histori të një familjeje shqiptare në Kosovë dhe jashtë saj, pasqyrë e vuajtjeve dhe sfidave të kaq shumë familjeve shiptare gjatë shumë dekadave”, ka shkruar ai.

Ajo ka thënë se sot për të u përmbyll një biografi mbi 40-vjeçare.

“Vajza e atëhershme, e cila në moshën 8-vjeçare u detyrua të largohej nga vendlindja, në moshën 10-vjeçare përjetoi atentatin ndaj babait dhe axhës, u rrit në një prej diktaturave më të egra komuniste në Evropë, përjetoi shembjen e diktaturës komuniste në Shqipëri, përjetoi rëndë diskriminimin dhe shtypjen e bashkëqytetarëve të saj në Kosovë gjatë viteve të 80-ta dhe 90-ta dhe më në fund në vitin 1999 e përjetoi lirinë dhe në qershor 1999 për herë të parë pas 19 vitesh mundi të kthehet në Kosovë, pra po ajo vajzë, të cilën përvoja e saj jetësore e mësoi që liria dhe demokracia e mirëfilltë është ajo, për të cilën asnjëherë nuk duhet ndalur së luftuari, sot ka marrë besimin të jetë përfaqësuese e Republikës në politikën e saj të jashtme. Mirënjohja ime për besimin ndaj meje është e thellë sa nuk thuhet”, ka shkruar Gërvalla.

Ajo tutje ka shtuar se është i madh detyrimi për ta përmbushur këtë detyrë me nder, punë të mira për Kosovën dhe hapjen e shtigjeve të reja për vendin dhe të gjithë qytetarët e tij.

J X

nga kategoria