Kryetari i ri i Kuvendit të Kosovës Dimal Basha në fjalimin e tij të parë si kryetar i Kuvendit ka lartësuar kontributin e UÇK-së, grave, SHBA-ve dhe të gjithë të tjerëve për të pasur një republikë sikur kjo sot. Ai nderoi edhe heronjtë e rënë, policët që u vranë gjatë ngjarjes famëkeqe në Banjskë.Në vazhdim një pjesë nga fjalimi i tij pas emërimit.
“Derisa e ndjej nderin dhe mirënjohjen për votën dhe besimin tuaj, njëkohësisht e ndjej edhe përgjegjësinë e madhë që më është besuar. Ky institucion është zemra e demokracisë sonë, vendi ku përfaqësohen zërat e të gjithë qytetarëve.
Republika jonë është e ndërtuar mbi sakrifica dhe besimin e përbashkët se liria dhe shteti jonë janë më të mëdha se çdo interes i përvetshëm.
Republika jonë është ndërtuar mbi sakrifica të panumërta. Mbi gjakun, mundin dhe qëndresën e atyre që besuan se e ardhmja e kombit ishte më e rëndësishme se vetë jeta e tyre. Një përulje dhe falënderim ndaj grave, vajzave, pra nënave dhe motrave tona të cilat brez pas brezi sakrifikuan veten, punuan në heshtje dhe ofruan dashuri dhe përkushtim.
Mos ta harrojmë mirësinë e Nënës Terezë, e cila na shërben si udhërrëfyes në rrugën e dashurisë dhe bamirësisë. Vlera të jashtëzakonshme të kombit tonë. Nderojmë nënën Zahide, nënën e Adem e Hamëz Jasharit, si dhe sakrificën e nënës Adile Jashari e cila si bashkëshortja e komandantit Adem Jashari luftoi krah për krah me të deri në minutin e fundit, duke e furnizuar me armë në përballjen me forcat fashiste të Millosheviqit.
Sot kjo Republike qëndron e pavarur edhe falë ndihmës së shteteve tona mike, në krye me SHBA. Ata sakrifikuan ushtarë që sot ne të jemi të lirë. Ju jemi mirënjohës për kontributin tuaj atëherë, por edhe tani”, deklaroi kryetari i Kuvendit Basha./VOXAL