Zv/kryeministri Arben Fetai sot mori pjesë në konferencën e Programit Global për Luftimin e Flukseve të Paligjshme Financiare.
Fetai u shpreh se do të ketë konsensus shtetëror për luftimin e korrupsionit dhe qasje më agresive ndaj shkelësve të ligjit.
Fjalimi i plotë i Arben Fetahit-
Asnjë vend, qofshin edhe ato më demokratike e më të zhvilluara, nuk është imun ndaj fenomenit të flukseve të paligjshme financiare, apo lëvizjeve të parave nga produktet e krimit dhe korrupsionit. Tanimë ekziston një konsensus se flukset e paligjshme financiare kanë ndikim thellësisht të dëmshëm në zhvillimin e ekonomive nacionale, stabilitetin social dhe në sigurinë tonë të përbashkët. Por, mbi gjitha, korrupsioni dhe lëvizjet e parasë së korrupsionit dëmtjonë besimin e qytetarëvë në institucionet e shtetit, dhe kësisoji edhe demokracinë.
Pra, asnjë vend nuk është imun ndaj këtij fenomeni, po në disa vende si ky i joni, kjo çështje ka marrë përmasa shqetësuese dhe të patolerueshme.
Fatkeqësisht, duhet të konstatojmë se qeveritë e mëparshme, përveç se nuk arritën ndonjë rezultat në adresimin e këtij problemi, ato u zhytën vetë në krim dhe në korrupsion. Madje, edhe vetë sistemi i drejtësisë që duhet të luftojë këtë epidemi me të cilën përballemi u bë pjesë e problemit dhe jo e zgjidhjes.
Dëshmia më e mirë për këtë është shkalla qesharake e vëllimit të aseteve kriminale të konfiskuara, në rënie nga viti në vit, ndërsa korrupsioni ka kapluar çdo pore të shtetit. Dëshmia tjetër është fakti se në vitin 2023, nuk kishim asnjë aktgjykim përfundimtar në rastet e korrupsionit të nivelit të lartë. Viti 2024 me gjasë do kalojë njësoj, por këtë vit kemi arritur kulmin me mbylljen e rastit ku një gjykatës i Gjykatës Supreme dhe një anëtar i Këshillit Gjyqësor u kapën duke marrë mito për të ulur dënimin e një politikani që trafikonte lëndë narkotike. Më keq se kaq nuk mundet.
Kjo gjendje sqaron më së miri pse besimi në drejtësi ka rënë në 2%, ndoshta edhe më pak tani në momentin që flasim. Por kjo gjendje është poashtu një nga arsyet pse opozita e djeshme sot është qeveria e re, me përkrahje plebishitare dhe me shumice prej gati 2/3 në Parlament. Ne tani si qeveri e re duhet t’u përgjigjemi pritshmërive të qytetarëve.
Si qytetar i këtij vendi, por edhe si Zëvendës-Kryeministër, jam i vetëdijshëm se nuk do të kemi mundësi ta çrrënjosim plotësisht krimin dhe korrupsionin si problem social dhe shtetëror.
Por, besoj shumë se me vullnet politik, të bashkuar, si qytetarë dhe si politikanë, si autorite vendore dhe partnerë ndërkombëtare, me ndihmën e mediave dhe të aktorëve tjerë të shoqërisë civile, mund të krijojmë mekanizma efikase që do na mundësojnë luftë efikase kundër kësaj epidemie. Për të patur sukses në këtë luftë, duhet të tregohemi agresiv dhe të pamëshirshëm ndaj shkelësve të ligjit. Duhet që rastet të procedohen dhe të dalin para autoriteteve sa më shpejt dhe pa vonesë, me verdikte finale dhe me konfiskim të aseteve kriminale.
Kështu e shoh edhe punën e GIZ dhe Komisionit tonë kombëtar në përgatitjen e Strategjisë për forcim të kapaciteteve për hetime financiare dhe konfiskimit të pasurisë për periudhën 2024-2028, qëllimi i së cilës është që kjo çështje të ngritet më lartë në nivel politik, me një qasje që ndërton konsensus shtetëror dhe është më agresive ndaj krimit dhe korrupsionit.
Pra, vetëm në këtë mënyrë, duke dëshmuar vullnet politik dhe duke forcuar kapacitetet institucionale për hetime financiare, si dhe me një qasje të koordinuar me përfshirjen e të gjitha institucioneve përkatëse, mund të sigurojmë luftë të suksesshme kundër korrupsionit dhe flukseve të paligjshme financiare.
Sigurisht se në këtë proces, është tejet e rëndësishme mbështetja që marrim nga partnerët ndërkombëtarë si GIZ. Me ekspertizën, eksperiencat dhe njohuritë e tyre, partnerët tanë duhet të na ndihmojnë në këtë proces të rëndësishëm reformues, që bashkërisht të ecim në drejtimin e duhur, për më tepër prosperitet dhe zhvillim, më tepër demokratizim dhe siguri.
Andaj, faleminderit për përkrahjen tuaj dhe punime të sukseshme në këtë takim të rëndësishëm.