Pas ndërhyrjes së redaksisë dhe kërkesës për rishqyrtim, Facebook ka rikthyer postimin e medias FLAKA, i cili më parë ishte fshirë pas një sërë raportimesh të dyshuara si të organizuara.
Postimi në fjalë ishte një lajm informativ mbi aktivitetin politik të Arben Fetait në komunën e Bërvenicës, i zhvilluar në kuadër të turit organizativ të Aleancës për Shqiptarët në rajonin e Pollogut.
Ngjarja theksonte pjesëmarrjen e përfaqësuesve të partive të tjera nga koalicioni opozitar VLEN, siç janë Abep Nuhiji, kryetar i nëndegës së Lëvizjes BESA në Bërvenicë dhe njëherësh këshilltar komunal, si dhe eksponentë të tjerë të formacioneve partnere.
Lajmi u bazua tërësisht në burime të hapura, deklarata publike, fotografi të postuara nga vetë Fetai dhe verifikime të pavarura nga redaksia, pa përmbajtje të diskutueshme apo shkelje të standardeve gazetareske.
Megjithatë, pas publikimit, postimi u shënjestrua në Facebook përmes një fushate të organizuar raportimesh, gjë që çoi në pezullimin e tij të përkohshëm. Flaka e ankimoi vendimin, duke theksuar se raportimi ishte faktik, i verifikuar dhe në përputhje me etikën profesionale të gazetarisë.
Dyshohet se pjesa që ka nxitur reagimin ishte përmendja e përfaqësuesve të partive të tjera në tubimin e Fetait, një detaj që duket se nuk i ka pëlqyer disa rrymave politike.
Flaka e konsideron keqpërdorimin e opsionit “Report” në rrjetet sociale si një formë moderne të censurës, që synon të ngulfatë fjalën e lirë, mendimin ndryshe dhe lirinë e informimit – shtylla thelbësore të një shoqërie demokratike.
Redaksia rithekson angazhimin e saj për informim profesional, të paanshëm dhe të pandikuar, duke vazhduar të raportojë me integritet, përtej çdo presioni apo përpjekjeje për ta heshtur zërin e saj. Flaka Media