Ministri i Ekonimisë dhe Punës, Besar Durmishi, ka njoftuar se në periudhën e ardhshme do të përgatisë ndryshime në Ligjin për veprimtari hotelierike në mënyrë që të sigurohet që verifikimi i kushteve minimale teknike për operim të bëhet para dhënies së licencës për operim, siç ishte rasti para vitit 2008.
Ministria, siç tha Durmishi, është ngarkuar që në seancën e Qeverisë të mbajtur më 18 mars, të fillojë me përgatitjen e amendamenteve të Ligjit.
“Këto ndryshime do të mundësojnë verifikimin e kushteve minimale teknike të operimit përpara dhënies së licencës. Pra, aplikacioni për plotësimin e kushteve minimale teknike për kryerjen e veprimtarive hotelierike, para se të dorëzohet si dokument përcjellës në kërkesën për licencë, do të duhet të ketë vërtetimin e origjinalitetit nga Inspektorati Shtetëror i Tregut”, tha Durmishi, ministër i Ekonomisë dhe Punës.
Durmishi shtoi se kushdo që ka shkelur ligjin duhet të mbajë përgjegjësi. Siç tha ai, qytetarët kanë të drejtë të informohen në mënyrë të duhur dhe të kërkojnë llogaridhënie.
Durmishi deklaroi se në arkivat e Ministrisë janë gjithsej 24 licenca aktive të lëshuara, 18 prej të cilave janë për kabare dhe të tjerat për klube. Për ata që nuk kanë licencë dhe punojnë, ai ka theksuar se ka organe të tjera kompetente që duhet t’i inspektojnë dhe t’i ndëshkojnë në përputhje me rrethanat.
Durmishi nënvizoi se zgjidhja e re ligjore do të rrisë vlerën e gjobave për të parandaluar ngjarje të pakëndshme si ajo në klubin Pulse në Koçan dhe shtoi se tashmë është duke punuar një grup punues për të.
“Nuk e di sa do të jenë gjobat, por padyshim që do të jenë shumë më të larta për të mos na ndodhur ngjarje të pakëndshme”, ka theksuar Durmishi.