Memet Alimi, i punësuar në Ministrinë e Punëve të Brendshme (MPB), nëpërmjet një statusi në profilin e tij në Facebbok, ka akuzuar për trajtim të padrejtë, poshtërim dhe ndjekje ndaj pjesëtarëve të MPB-së me përkatësi shqiptare, mbi bazë politike dhe etnike. Në publikimin e tij, Alimi thekson se në vend që të respektohen parimet e profesionalizmit dhe barazisë, ndodhin praktika të padrejta, konkretisht degradim dhe transfere pa baza profesionale.
“Degradim i padrejtë i funksioneve pa arsye profesionale. Transfere selektive, të cilat bazohen në bindje politike ose etnike, e jo në bazë ligjore. Nënçmim i moralit dhe profesionalizmit, me ç’rast krijohet klimë frike dhe pasigurie. Shpërfillje e kritereve ligjore për avancim, ku vendimet varen nga lidhjet partiake”, shkruan Alimi, ndërsa paralajmëron se këto veprime jo vetëm që e shkelin Kushtetutën dhe ligjet, por edhe seriozisht e dëmtojnë funksionimin e institucioneve të sigurisë.
Në ndërkohë, gjithnjë e më të zëshëm janë shqiptarët në MPB për shkak të degradimit mbi baza politike që po zbatohet në vitin e fundit 2025. Tashmë, thonë burime jozyrtare të gazetës KOHA, në prag të zgjedhjeve lokale, një grup më i madh policësh shqiptarë janë shpërndarë në vende pune më të ulëta me urdhër, në kundërshtim me ligjin, ndërsa është i madh edhe diskriminimi në vende udhëheqëse, sidomos në Shkup./Koha.mk/