Një tjetër skandal i rëndë po trondit skenën politike në Maqedoninë e Veriut, ku zyrtarët e lartë të Bashkimit Demokratik për Integrim (BDI) akuzohen për zhvatje të miliona eurove në një nga projektet më të promovuara të viteve të fundit – autostrada Shkup-Bllacë.
Pas viteve të zvarritjeve dhe premtimeve të pambajtura, tani po dalin në dritë fakte tronditëse: autostrada nuk u ndërtua kurrë jo për shkak të vështirësive teknike apo mungesës së fondeve, por për shkak të një skeme të mirëplanifikuar për përfitime personale.
Sipas raportimeve të ndryshme, zyrtarë të lartë të BDI-së duke pasur informacione të brendshme mbi trasenë e planifikuar të autostradës, kanë blerë truall në zonat strategjike për të përfituar miliona nga kompensimet që vijnë me shpronësimin nga shteti.
Një tjetër skandal lidhet me ish-drejtorin e Ndërmarrjes Publike për Rrugë Shtetërore, Ejup Rustemin.
Sipas burimeve, Rustemi ka kërkuar një mendim nga ish udhëheqësia e Ministrisë së Mjedisit Jetësor për të shpallur një pjesë të trasës si zonë të mbrojtur ekologjike.
Ministria, në mënyrë të përshpejtuar, ka miratuar këtë kërkesë, duke sugjeruar zhvendosjen e trasës. Shumë ekspertë kanë shtruar dilemën A ishte kjo një lëvizje e qëllimshme për të rritur vlerën e tokës në atë zonë dhe për të përfituar financiarisht?
Nuk mund të harrohet se, para zgjedhjeve, figura kyçe si Bujar Osmani shpesh promovonin projektin si një sukses të afërt. Fotot nga terreni dhe premtimet e bujshme se “rruga po kryhet” kanë qenë të shumta, por sot, rruga është e papërfunduar. Në mars të vitit 2021, Ejup Rustemi premtoi se projekti do të përfundonte brenda mandatit aktual. Realiteti? Një tjetër dështim.
Me ndryshimin e pushtetit, shumë ekspertë pohojnë se më në fund është zbuluar arsyeja pse ky projekt kurrë nuk u realizua. Jo për mungesë parash, as për probleme teknike, por për të krijuar një mundësi për përfitime personale nga individë të lidhur me BDI-në.