Me ligjin e ri për lojërat e fatit, i cili pritet të miratohet ditëve në vijim, grupimi VLEN nuk ka arritur të përfshijë asnjë nga premtimet e tij elektorale që lidhen me këtë sektor. Përkundrazi, në vend që të frenohet ky fenomen – siç u tha me zë të lartë gjatë fushatës – qeveria përmes këtij ligji po merr në duart e saj kontrollin e plotë dhe të drejtpërdrejtë të licencimit të operatorëve të lojërave të fatit.
Në nenin 116 të ligjit thuhet qartë se: “Lojërat e fatit nëpërmjet internetit organizohen në bazë të licencës për organizimin e lojërave të fatit në internet, e cila jepet nga Qeveria e Republikës së Maqedonisë së Veriut, në bazë të një kërkese të dorëzuar pranë Ministrisë së Financave, pas marrjes paraprake të mendimit nga Ministria për Transformim Digjital, brenda 90 ditëve nga dorëzimi i kërkesës, në përputhje me ligjin.”
Neni 27 thotë “Reputacioni është ndershmëria, kompetenca, punëtorësia dhe posedimi i integritetit personal, të cilat japin siguri se personi nuk do të ndikojë në mënyrë që të rrezikojë ose dëmtojë reputacionin dhe besimin e publikut ndaj shoqërisë për organizimin e lojërave të fatit”. Pyesim grupacionin “VLEN”, nëse patën rast të shprehin mendimin e tyre për nenin kur flitet për moral në lojërat e fatit online.
Kjo do të thotë vetëm një gjë: VLEN, në vend që të ndalë lojërat e fatit, ia ka dorëzuar gjithë kontrollin qeverisë për t’i shpërndarë licencat sipas interesave të saj.
Deklaratat pompoze të Izet Mexhitit për “mbylljen e lojërave të fatit në internet” po rezultojnë një bllof i madh politik. E vërteta është se janë mbyllur disa platforma që vepronin ilegalisht, ndërkohë që me këtë ligj po krijohet hapësira për të ndërtuar një monopol të pastër shtetëror, përmes një kompanie ku Mexhiti tashmë ka pozicionuar njerëzit e tij të besuar.
Aleanca për Shqiptarët pyet nëse VLEN është në dijeni të përmbajtjes së ligjit që po gatuhet nga VMRO-DPMNE dhe që këto ditë pritet të miratohet nga qeveria?
Apo VLEN nuk pyetet për asgjë dhe thjesht voton për kuorum, duke ndjekur urdhrat e partnerëve të saj maqedonas?
Nëse fushata për “shuarjen e lojërave të fatit” ka përfunduar në një qeverisje me monopol shtetëror të kontrolluar politikisht, atëherë qytetarët shqiptarë kanë të drejtë të ndihen të mashtruar.
VLEN nuk është duke qeverisur – thjesht është duke zbatuar urdhra nga patronët. Ky është realiteti, dhe qytetarët nuk mund të manipulohen më me propagandë boshe.
Aleanca për Shqiptarët