“Kur Komisioni Mbikëqyrës?” është pyetja që ka parashtruar nisma qytetare “Kush e ka radhën?”, dhe e kanë vendosur si transparent, në mënyrë simbolike, para kuvendit të Maqedonisë së Veriut, transmeton Portalb.mk.

“Kur Komisioni Mbikëqyrës? – është pyetja që të gjithë e kemi bërë për 125 ditë, 3,000 orë dhe 10,800,000 sekonda, nga Koçani në Shkup dhe anasjelltas. Deputetët zgjidhen për të mbrojtur interesat e qytetarëve, jo për të heshtur kur duhet të vendoset kontroll mbi institucionet dhe për të qenë bashkëpunëtorë në krijimin e një sistemi pa kontroll dhe drejtësi” thuhet në kumtesën e nismës “Kush e ka radhën?”.

“Pyetja ‘Kur do të formohet komisioni mbikëqyrës?’ nuk është një pyetje teknike, por një çështje lirie, demokracie dhe mbrojtjeje nga abuzimi. Prandaj, jo vetëm që (do) pyesim vazhdimisht, por edhe kërkojmë! Komisioni mbikëqyrës është një borxh ndaj 62 jetëve të humbura, jo llogaritje partiake dhe favore politike. Populli sheh dhe nuk harron!”, thonë nga “Kush e ka radhën?”.

Ndërkaq, para zyrave të Prokurorit Publik, ata shfaqën një pjesë të tekstit të IRL-së, duke i pyetur deputetët se si do të vepronin pas thirrjes për veprim në të cilën 5,000 qytetarë kërkuan një seancë mbikëqyrëse mbi dështimet sistemike që çojnë në aksidente, dhe të gjithë deputetët e VMRO-DPMNE-së dhe LSDM-së bënë deklarata tronditëse – se nuk janë përgjegjës ndaj votuesve, por ndaj partisë.

Më 24 qershor, kur kaluan saktësisht 100 ditë që nga tragjedia në Koçan, iniciativa “Kush e ka radhën”, vendosi 100 mesazhe pakënaqësie në qendër të Shkupit dhe para institucioneve kryesore – një për çdo ditë në të cilën institucionet heshtin, nuk marrin përgjegjësi dhe nuk ofrojnë ndihmë.

Zjarri në Koçan shpërtheu natën e 15-16 marsit, duke rezultuar me 62 viktima dhe duke plagosur pothuajse 200 të tjerë. Prokuroria ka ngritur akuza kundër 34 personave të cilët, nëpërmjet veprimeve ose mosveprimeve të tyre brenda sistemit, shkaktuan katastrofën. Aktakuza përfshin gjithashtu tre kompanitë e pronarit të diskotekës, i cili është i pandehuri kryesor.

Në raportin më të fundit të Komisionit Evropian për zgjerimin, “2024 Communication on EU Enlargement Policy”, Bashkimi Evropian ka vendosur një pasqyrë të qartë dhe të pakompromis për Maqedoninë e Veriut: pa ndryshime kushtetuese dhe pa reforma të thella në drejtësi, nuk ka avancim në procesin e anëtarësimit.

Raporti thekson se vendi ka mbajtur një përkushtim të qëndrueshëm politik ndaj integrimit evropian dhe ka përmbushur fazën teknike të “screening”-ut në fund të vitit 2023. Megjithatë, progresi drejt hapjes së klasterit të parë të negociatave varet nga zbatimi i reformave kyçe, sidomos në fushën e sundimit të ligjit dhe luftës kundër korrupsionit të nivelit të lartë.

“Nevojitet besim në sistemin e drejtësisë dhe një bilanc i qartë me hetime, ndjekje penale dhe dënime për korrupsionin në nivelet më të larta,” thekson raporti.

Një tjetër kusht i pazëvendësueshëm është ndryshimi i Kushtetutës për përfshirjen e qytetarëve bullgarë, një obligim i marrë nga Shkupi në kuadër të procesit të negociatave. Derisa kjo të realizohet, dera për hapjen e kapitujve mbetet e mbyllur.

Raporti gjithashtu vlerëson angazhimin e plotë të vendit me politikën e jashtme dhe të sigurisë të BE-së, si dhe përmend rolin pozitiv si kryesues i OSBE-së në vitin 2023. Megjithatë, BE kërkon që marrëveshjet me Greqinë dhe Bullgarinë të zbatohen pa mëdyshje dhe në mirëbesim.

Në përfundim, Komisioni Evropian dërgon një mesazh të qartë: reformat nuk janë më dëshirë, por kusht për të ardhmen evropiane të Maqedonisë së Veriut. (INA)

Shkëlzen Goqi ishte njëri prej pjesëmarrësve në garën e kërcimeve në ujë nga “Ura e Vezirit” në Podgoricë të Malit të Zi. Gara është mbajtur të shtunën, ndërsa Goqi para se të bënte kërcimin e bukur, bëri figurën e shqiponjës dykrenare.

Nga shikuesit, që ishin të shumtë, janë dëgjuar fishkëllima. Ndërkohë Goqi i cili është nga Gjakova, që është i njohur për kërcimet nga lartësia, është diskualifikuar nga gara tradicionale.

Për këtë kanë shkruar të gjitha mediat në Mal të Zi.

Veprimi i zakonshëm i sportistëve shqiparë me simbolin e flamurit, nga një pjesë e shikuesve, por edhe nga pjesëmarrës të tjerë dhe organizatorë, është parë si provokim.

Vetë Goqi për KOHËN ka konfirmuar se erdhi te një incident pasi ai bëri figurën e shqiponjës dykrenare, që tashmë e bëjnë shumë e shumë sportistë shqiptarë, sidomos kur festojnë një sukses.

Garat e kërcimit në ujë nga “Ura e Vezirit” janë mbajtur për herë të parë pas 15 vjetësh. Garën e fitoi Edvald Krniq dhe ai ka thënë se e ka iniciuar diskualifikmin e Goqit.

Figurën dykrenare, mediat e Malit të Zi e kanë vlerësuar simbol të “Shqipërisë së Madhe” dhe veprimin e garuesit kosovar si “provokim ndaj një pjese të publikut”.

“Menjëherë kam intervenuar te juria profesionale që mori vendimin për diskualifikimin e tij. Ai më pas mori ndalesë nga garat e këtij lloji në Podgoricë”, ka thënë Krniq për gazetën “Pobeda”.

Edhe sekretari për sport i Podgoricës, Darko Nikçeviq, ka konfirmuar diskualifikimin.

“Është e vërtetë që gjatë paraqitjes së njërit prej garuesve edhe te një gjestikulacion i papërshtatshëm, kur me shfaqjen e shqiponjës dykrenare ka thyer rregullat e sjelljet në ngjarjet sportive. Ka reaguar juria, që mori vendim për diskualifikim të garuesit, tërësisht në bazë të thyerjes së rregullave të manifestimit, që qartë nuk lejojnë shfaqjen e simboleve dhe porosive të papërshtatshme politike, nacionale dhe të natyrave tjera”, ka thënë Nikçeviq.

Në fakt nuk ka rregulla që ndalojnë festimin apo shfaqjen e figurës së shqiponjës dykrenare, e po ashtu që shqiponja është provokim për të tjerat.

Në garat tradicionale të kërcimeve në ujë shpesh nuk ka rregulla të shkruara, sidomos për mënyrën se si paraqiten pjesëmarrësit. Kryesisht veprohet nga bazë të qëndrimit të organizatorëve dhe jurisë.

Suspendimi i garuesit të Kosovës është dëshmi që ndikimi i serbëve në Mal të Zi vazhdon të jetë i madh.

“E kam përshëndetur publikun dhe e kam bërë shqiponjën. Aty është acaruar publiku serb që ishte prezent. Malazezët e shqiptarët jo. E bëra hedhjen në lartësi 27 metra dhe ishte kërcim perfekt. E kisha edhe një kërcim tjetër. U drejtova tek ura për të bërë kërcimin e dytë, por aty ishin duke më pritur disa huliganë serbë. Më bënin me shenjë se do më prejnë në fyt e provokime të tjera të kësaj natyre. Edhe veshjet sportive i kisha me shqiponjë dhe kanë kërkuar që t’i heq. Natyrisht, as që jam lodhur për ta dhe për provokimet e tyre. Erdhi organizatori dhe më tërhoqi prej garës, ndërsa unë u takova me shokët e klubit, Florid Gashi e Vedat Krasniqi. Pos provokimit në urë nga serbët, çdo gjë ishte në rregull”, ka thënë Goqi për KOHËN.

Në Kosovë, e sidomos në Gjakovë, garat e kërcimeve nga lartësia në stil “dallëndyshe” janë goxha të popullarizuara. Bëhet fjalë për kërcime edhe të rrezikshme, që pëlqehen shumë në masë.

Në Podgoricë të shtunën u prit keq kombinimi i kërcimit “dallëndyshe” me figurën e shqiponjës.