Banorët e fshatit Jazhincë, me rreth 1,800 banorë dhe mbi 400 shtëpi, vazhdojnë të jetojnë pa mjek. Në qendër të fshatit ndodhet një ambulancë e re, por dyert e saj kanë mbetur të mbyllura, sepse aty nuk është emëruar kurrë një mjek, raporton Portalb.mk.
Si pasojë, banorët detyrohen të udhëtojnë kilometra të tëra për ndihmë mjekësore, më së shpeshti drejt Tetovës, rreth 30 kilometra larg, ose në Vratnicë, vetëm 8 kilometra larg, por ku ambulanca funksionon vetëm deri në orën 14:00.
Situata bëhet edhe më e rëndë gjatë dimrit, kur rrugët shpesh bllokohen nga bora.
“Ambulanca është ndërtuar 34 vjet më parë me kontributin e fshatrave. Sot nuk kemi mjek. Kemi kërkuar nga Ministria e Shëndetësisë, gjatë gjithë periudhave, në varësi të partive në pushtet, por nuk kemi hasur në mirëkuptim” , tha një banor.
“Nuk kemi mjek këtu. Nuk ka asgjë, jemi të harruar. Ndonjëherë shkojmë në Vratnicë, ndonjëherë në Tetovë, ku gjejmë mjek e ku nuk gjejmë. Ka mbi 30 vjet që ambulanca është e tillë dhe askush nuk interesohet”, tha një tjetër banor.
“Ne shkojmë në Tetovë, sepse ambulanca nuk funksionon. Ka ambulancë, por nuk punon. Asnjë mjek nuk vjen. Është ndërtuar para më shumë se 20 vitesh dhe qëndron e mbyllur, sepse asnjë mjek nuk ka ardhur”, tha një banor.
I pyetur për mungesën e mjekëve në vendbanimet rurale, ministri i Shëndetësisë, Azir Aliu, nuk kishte zgjidhje konkrete. Ai tha se po bëhen analiza për riorganizimin e shërbimeve shëndetësore.
“Në të njëjtën kohë bëjmë analizë funksionale dhe infrastrukturore dhe shumë shpejt do të dalim me një plan gjeneral për Ministrinë e Shëndetësisë, si krijuese e politikave shëndetësore, si për spitalet dhe institucionet shëndetësore, si implementues të këtyre politikave, ku do të dihet se çfarë infrastrukture do të ketë, çfarë shërbimesh do të jepen dhe sa do të jetë koha e dhënies së atyre shërbimeve”, tha Aliu.
Ndryshe, fshati Jazhincë ndodhet rreth 27 kilometra larg Tetovës, aty ka rreth 400 shtëpi ndërsa shumë prej tyre kanë ngelur të boshatisura për shkak të migrimit.