Aleanca për Shqiptarët ka reaguar ndaj pretendimeve të fundit të VMRO-DPMNE, duke i cilësuar ato si shpifje absurde që vijnë si pasojë e krizës së thellë politike që po kalon kjo forcë. Në një kumtesë për media, Aleanca thekson se është e përqendruar në punën dhe misionin e saj për fitoren në zgjedhjet e Tetorit, duke refuzuar të përfshihet në lojëra politike apo retorikë fyese.
Partia thekson se vendimi për të dalë nga Qeveria ishte i qëllimshëm dhe dëshmi e qëndrimit të saj të pakorruptueshëm, një vlerë që, sipas tyre, duket e pamundur për disa parti në pushtet.
“Jemi në rrugën e duhur dhe në ditët tona më të mira”, thuhet në përmbyllje të reagimit.
Kumtesa e plotë:
Aleanca për Shqiptarët ka ndjekur me vëmendje “pretendimet” e VMRO-së ndaj partisë tonë dhe kryetarit të saj. Është e pritshme që në këto ditë të rënda të kësaj Qeverie në hall, në mungesë të plotë të argumenteve politike, të ketë shpifje të llojit më absurd.
Ne jemi qetësisht të përqëndruar në punën tonë drejt Fitores së Tetorit dhe nuk duam të rëndojmë me asnjë fyerje apo pseudo-akuzë VMRO-në e cila ka mjaftueshëm halle aktualisht.
Vetëm fakti që dolëm nga Qeveria me vullnetin tonë flet qartë se sa pak të korruptueshëm jemi dhe ndoshta kjo është e pakonceptueshme për disa parti që janë në pushtet.
Aleanca për Shqiptarët është në rrugën e duhur dhe në ditët e saj më të mira!